صدر جمہوریہ ۳۱؍اکتوبر کو دو روزہ دورے پر لہیہ جائیں گی

سرینگر//
صدر جموریہ‘دروپدی مرمو ۳۱؍ اکتوبر کو مرکز کے زیر انتظام لداخ کا دو روزہ دورہ کر رہی ہیں۔
صدر ہند کا لیہہ میں یو ٹی ڈے کی تقریبات میں شرکت کرنے اور سیاچن گلیشیئر کا دورہ کرنے کا منصوبہ ہے۔ لداخ کے اپنے دو روزہ دورے کے دوران صدر ہند، سرحد کی حفاظت کرنے والے فوجیوں سے ملاقات کریں گی۔
اس حوالے سے لداخ انتظامیہ کے ایک سینئر افسر نے بتایا ’’لداخ میں چوتھا یو ٹی ڈے منایا جا رہا ہے۔ اس میں صدر کی مرکزی تقریب میں شرکت کا منصوبہ ہے۔ لداخ کے ایل جی بریگیڈیئر (ریٹائرڈ) بی ڈی مشرا اور دیگر سینئر انتظامی اور پولیس افسران۳۱؍اکتوبر کو سندھو ہال میں منعقد ہونے والے پروگرام میں صدر کے ساتھ موجود ہوں گے۔ لداخ خود مختار پہاڑی ترقیاتی کونسل (ایل اے ایچ ڈی سی) لیہہ کے چیئرمین اور سی ای سی تاشی گیالسن، ایگزیکٹو کونسلر اور کونسلر پروگرام میں شرکت کریں گے۔‘‘
افسر کا مزید کہنا تھا کہ صدر جمہوریہ کو ۳۱؍اکتوبر کی صبح سندھو گھاٹ کا دورہ کرنے کا منصوبہ ہے۔ اگلے روز یکم نومبر کو صدر جمہوریہ، فوجی حکام کے ساتھ سیاچن گلیشیئر کا دورہ کریں گی۔
صدر کے دورے کے موقع پر فوج کے اعلیٰ افسران بھی موجود ہوں گے۔ صدر کا لداخ کے ایل جی اور فوجی کمانڈروں کے ساتھ میٹنگ کرنے کا بھی منصوبہ ہے۔ یوٹی ڈے پر راج بھون اور راج نواس میں لیہہ کے مختلف اسکولوں کے طلباء اور اساتذہ کے ذریعے پریزنٹیشن دینے کا بھی منصوبہ ہے۔
اس سے قبل۱۱؍اکتوبر کو صدر جمہوریہ کشمیر یونیورسٹی کے کنوکیشن کی تقریب میں شریک ہوئی تھی اور اگلے دن انہوں نے شری ماتا ویشنو دیوی کے دربار پر حاضری دی تھی۔