مفرور دہشت گردوں کیخلاف پولیس کی کارروائی جاری

سرینگر//
دہشت گرد عناصر کے خلاف اپنا کریک ڈاؤن جاری رکھتے ہوئے حکام نے جمعہ کو جنوبی کشمیر کے پلوامہ ضلع کے اونتی پورہ کے نور پورہ گاؤں میں ایک مفرور دہشت گرد کی غیر منقولہ جائیداد ضبط کر لی۔
پولیس اونتی پورہ نے بتایا کہ دہشت گردی کے ہینڈلر فیروز گنائی ولد نبیر گنائی کی ایک کنال اور ۱۵مرلہ باغات کی اراضی پر پھیلی ہوئی جائیداد کو پولیس اونتی پورہ نے ایڈیشنل سیشن پلوامہ (این آئی اے کورٹ) کی عدالت کے حکم پر ضبط کیا ہے۔
اس حکم پر آج پولیس اور گاؤں کے نمائندوں کے ساتھ ریونیو حکام نے عمل کیا۔
ترجمان نے کہا’’مذکورہ دہشت گرد کوانڈین آرمز ایکٹ کے تحت پولیس اسٹیشن ترال میں اشتہاری مجرم قرار دیا گیا تھا۔ قبل ازیں مفرور دہشت گرد تفتیشی ایجنسی کے سامنے پیش ہونے میں ناکام رہا‘‘۔
قابل ذکر بات یہ ہے کہ پاکستان میں مقیم دہشت گرد فیروز گنائی اسلحے اور گولہ بارود اور مقامی دہشت گردی کے نیٹ ورکس کو فعال کر کے دہشت گردانہ سرگرمیوں کو فروغ دینے اور دوبارہ زندہ کرنے میں ملوث ہے۔