لو جی کرگل میں پہاڑی ترقیاتی کونسل کے الیکشن کیا جیت لئے ‘ اپنے گورے گورے بانکے چھورے‘عمرعبداللہ توساتوں آسمان پر ہیں…اچانک سے عمر عبداللہ بڑی بڑی باتیں کرنے لگے ہیں… جیسے انہوں نے جموں کشمیر میںکوئی الیکشن جیت لیا ہو… کوئی ان سے کہے کہ جناب وہ دن گئے جب کرگل ‘ جموں کشمیر کا حصہ ہوا کرتا تھا… اب نہیں کہ… کہ کرگل کی اب اپنی ایک الگ دنیا ہے جس میں وہ رہتا ہے… اس کا ہماری دنیا سے کوئی لینا دینا نہیں ہے… ہو تاتو ہمیں عمر عبداللہ کا خوشی سے اچھلنا سمجھ میں آتا… لیکن کیا کیجئے گا کہ اپنے گورے گورے بانکے چھورے سیاستدان ہیں اور…اور سیاستدان کو جب ایک بڑی مدت کے بعد کوئی خوشی ملتی ہے تو… تو وہ پھولے نہیں سما تا ہے… اور… اور اپنے عمر عبداللہ کے ساتھ بھی ایسا ہی ہوا… اور اسی خوشی میں انہوں نے بڑی بڑی باتیں کیں… ہم تو انہیں بڑی باتوں سے روک نہیں سکتے ہیں… لیکن… لیکن انہیں ایک بات… چھوٹی بات ضرور کہنا چاہتے ہیں کہ… کہ جناب یقین کیجئے کہ جموں کشمیر میں الیکشن اس لئے نہیں ہورہے ہیں کہ بی جے پی الیکشن نہیں چاہتی ہے… ہار کے ڈر کی وجہ سے الیکشن نہیں چاہتی ہے… نہیں صاحب ایسا نہیں ہے اور… اور اس لئے نہیں ہے کہ بی جے پی اتنی بے قوف اور احمق نہیں ہے… بالکل بھی نہیں جو اس کی سمجھ میں یہ بات نہیں آئیگی کہ الیکشن میں تاخیر سے اس کا کچھ بھلا ہونے والا نہیں ہے… الٹا نقصان ہی ہوگا … اور اس لئے ہو گا کہ… کہ بی جے پی جموں کشمیر میں ایسا کچھ بھی نہیں کررہی ہے تاکہ اس کو جو نقصان ہوا ہے… اس کی بھر پائی ہو… اور اس بھر پائی کے بعد وہ الیکشن کراتی… ایسا ویسا کچھ نہیں ہے…اور یہ بات اپنے عمر صاحب کی سمجھ میں آنی چاہئے اور… اور ہمیں امید ہے کہ آجائیگی… جب ایک بار کرگل میں ہو ئی جیت کی خوشی ‘ جیت کے جشن کا بھوت ان کے سر سے اتر جائیگا۔الیکشن ہوں گے اور… اور ضرور ہوں گے… جیسا کہ ہمارے عزت مآب وزیرداخلہ نے لوک سبھا میں کہا تھا… چار پانچ سال پہلے کہا تھا کہ ایک مناسب وقت پر جموںکشمیر میں الیکشن کرائے جائیں گے … یہی بات الیکشن کمیشن نے بھی کہی ہے… اور وہ مناسب وقت کب آئیگا … اس بات کا فیصلہ ‘ یہ طے کرنے کا اختیار عمر صاحب کو کسی نے تفویض نہیں کیا ہے… بالکل بھی نہیں کیا ہے… جن کو یہ اختیار ہے‘ انہیں ہی اس مناسب وقت کا فیصلہ کرنے دیجئے…تب تک عمرصاحب آپ کرگل میں ہوئی جیت کا جشن منائیے ۔ ہے نا؟