عالمی یوم سیاحت:ایل جی سنہا کی سیاحوں کو جموں وکشمیر کی سیر دعوت

سرینگر//
جموںکشمیر کے لیفٹیننٹ گورنر ‘منوج سنہا نے بدھ کے روز عالمی یوم سیاحت کے موقع پر سیاحوں کو جموں وکشمیر کی سیر پر آنے کی دعوت دی۔
سنہانے سیاحوں سے کہا کہ وہ آکر یہاں کے دلکش مناظر اور پکوان کے خزانوں سے محظوظ ہوجائیں۔
لیفٹیننٹ گورنر نے ان باتوں کا اظہار’ایکس‘پر اپنے ایک پوسٹ میں کیا۔
سنہا نے کہا’’عالمی یوم سیاحت کے موقع میں آپ سب کو جموں وکشمیر کی سیر کرنے کی دعوت دیتا ہوں جو بھارت کا تاج ہے ‘‘۔
ان کا پوسٹ میں مزید کہنا تھا’’جموں وکشمیر آکر یہاں کے دلکش نظاروں، پکوان کے خزانوں، شاندار ثقافت اور یہاں کی مہمان نوازی سے لطف اندوز ہوجائیں‘‘۔
سرکاری ذرائع کے مطابق رواں سال کے۳۱ اگست تک ایک کروڑ۵۲لاکھ سیاح جموں وکشمیر کے سیاحتی مقامات کے دلفریب نظاروں سے لطف اندوز ہوئے ہیں۔انہوں نے کہا کہ سال گذشتہ ایک کروڑ۸۸لاکھ سیاح یہاں آئے جبکہ امسال یہ تعداد۲کرووڑ سے تجاوز کرنے کی توقع ہے ۔
محکمہ سیاحت کے عہدیداروں کا کہنا ہے کہ سری نگر میں رواں سال کے ماہ مئی میں منعقدہ جی ٹونٹی ٹورزم اجلاس کے باعث غیر ملکی سیاحوں کی آمد میں۵۹فیصد اضافہ درج ہوا ہے ۔
عہدیداروں نے کہا کہ جموں وکشمیر میں جہاں نئے سیاحتی مقامات کو منظر نامے پر لایا جا رہا ہے وہیں سیاحوں کے لئے تمام تر سہولیات کی فراہمی کو یقینی بنانے کے لئے انفراسٹکریچر کو دستیاب رکھا جا رہا ہے ۔
بتادیں کہ دنیا میں۲۷ستمبر کو عالمی یوم سیاحت کے بطور منایا جاتا ہے ۔