سکیورٹی کور گروپ کی میٹنگ:ڈی جی پی اور آرمی کور کمانڈر کاسیکورٹی منظر نامے کا جائزہ

سرینگر//
فوج کی چنار کور کے کمانڈر لیفٹیننٹ جنرل راجیو گھائی اور جموں وکشمیر پولیس کے سربراہ دلباغ سنگھ نے پیر کو یہاں بادامی باغ فوجی چھاونی میں ایک سیکورٹی میٹنگ کی مشترکہ صدارت کی۔
اس غیر معمولی اہمیت کی حامل میٹنگ میں سیکورٹی صورتحال کا جائزہ لینے کے ساتھ ساتھ انسداد دراندازی اور انسداد دہشت گردی گرڈ کو مضبوط کرنے کی خاطر طریقہ کار پر غور کیا گیا۔
دفاعی ذرائع نے بتایا کہ چنار کور کمانڈر لیفٹیننٹ جنرل راجیو گھائی اور پولیس سربراہ دلباغ سنگھ کی سربراہی میں پیر کے روز بادامی باغ فوجی چھاونی میں جموں وکشمیر کے سیکورٹی منظر نامے کا جائزہ لیا گیا۔انہوں نے کہاکہ میٹنگ کے دوران انسداد دراندازی گرڈ کو مضبوط کرنے کے طریقہ کار پر غور کیا گیا۔
میٹنگ کے دوران کشمیر میں سرگرم دہشت گردوں کے خلاف چلائے جارہے آپریشنز کے بارے میں کور کمانڈر اور پولیس سربراہ کو جانکاری فراہم کی گئی۔
ذرائع نے بتایا کہ میٹنگ کے دوران کور کمانڈر اور پولیس چیف نے آفیسروں کو ہدایت دی کہ دہشت گردوں اورا ن کے سہولیت کاروں کے خلاف کارروائیاں جاری رہنی چاہئیں۔انہوں نے کہاکہ جموں وکشمیر میں امن و امان کو مضوط کرنے کیلئے ہماری کوششیں جاری رہیں گی۔
ذرائع نے بتایا کہ میٹنگ کے دوران ایل او سی پر سیکورٹی گرڈ کو مزید مضبوط بنانے پر بھی زور دیا گیا تاکہ ملک دشمن عناصر کے منصوبوں کو ناکام بنایا جاسکے۔
کور کمانڈر اور پولیس سربراہ کو ایل او سی پر فوج کی تعیناتی کے بارے میں بھی جانکاری فراہم کرتے ہوئے بتایا گیا کہ کسی کو بھی اس طرف آنے کی اجازت نہیں دی جائے گی۔
پولیس سربراہ نے کہاکہ دہشت گردوں اور ان کے معاونین کے خلاف سخت کارروائی عمل میں لانے کی ضرورت ہے۔انہوں نے کہاکہ سیکورٹی ایجنسیوں کے درمیان قریبی تال میل کی وجہ سے ہی دہشت گردوںکے خلاف چلائے جارہے آپریشنز کامیابی سے ہمکنار ہو رہے ہیں۔معلوم ہوا ہے کہ میٹنگ کے دوران کشمیر صوبے کی سیکورٹی صورتحال کا از سر نو جائزہ لیا گیا۔
ذرائع نے بتایا کہ میٹنگ کے دوران فیصلہ لیا گیا کہ جموں وکشمیر میں سیکورٹی گرڈ کو مضبوط بنانے کے ساتھ ساتھ ہیومن انٹیلی جنس کو بھی فعال کیا جائے گا تاکہ سماج دشمن عناصر کے منصوبوں کو ناکام بنایا جاسکے۔
بتادیں کہ یہ میٹنگ گڈول کوکر ناگ میں ہوئی تصادم آرائی کے تناظر میں منعقد ہوئی جس دوران اہم معاملات پر تبادلہ خیالکیا گیا۔
واضح رہے کہ گڈول کوکر ناگ میں سات روز تک جاری رہنے والی جھڑپ میں تین اعلیٰ آفیسران جاں بحق ہوئے تھے۔