’جموں کشمیر پھر فلم شوٹنگ کی پسندیدہ منزل بن رہا ہے‘

سرینگر//
جموں و کشمیر کے لیفٹیننٹ گورنر منوج سنہا کا کہنا ہے کہ نئی فلم پالیسی لانچ کرنے کے بعد جموں و کشمیر ایک بار پھر فلم شوٹنگ کی پسندیدہ منزل بن رہا ہے ۔
سنہا نے کہا کہ فلم شوٹنگ کیلئے وادی میں۸۰کی دہائیوں کا دور دوبارہ لوٹ رہا ہے ۔
لیفٹیننٹ گورنر نے ان باتوں کا اظہار جمعہ کے روز یہاں زیرو برج پر ٹی وی سیریل’پشمینہ‘کے پہلے دن کے شوٹ کا افتتاح کرنے کے بعد نامہ نگاروں کے ساتھ بات کرنے کے دوران کیا۔
سنہانے کہا’’جموں وکشمیر کشمیر انتظامیہ نے دو برس قبل تمام متعلقین کے ساتھ صلح مشورے کے بعد نئی فلم پالیسی لانچ کی تھی‘‘۔
ایل جی کا کہنا تھا’’اس کے بعد ہم دیکھ رہے ہیں کہ جموں وکشمیر فلم شوٹنگ کیلئے پسندیدہ منزل بن رہا ہے ‘‘۔
سنہا نے کہا کہ۸۰کی دہائی میں جو یہاں ہالی ووڈ اور بالی ووڈ کی شوٹنگ ہورہی تھی وہ دور دوبارہ لوٹ رہا ہے ۔ انہوں نے کہا کہ آج ہم نے پشمینہ نام کے سیریل کا افتتاح کیا اس سے یہاں کے نوجوانوں کو روزگار ملے گا اور معیشت بھی مستحکم ہوگی۔
ان کا کہنا تھا کہ گذشتہ برسوں کے دوران یہاں ۳سو فلمیں شوٹ کی گئیں۔