سرینگر میں جعلی سرٹیفکیٹس بنانے والاگرفتار :پولیس

سرینگر//
جموں وکشمیر کی گرمائی راجدھانی سر ی نگر کے قمر واری علاقے میں رقومات کے عوض جعلی سرٹیفکیٹس بنانے والے شخص کو پولیس نے گرفتار کیا ہے۔
پولیس نے ٹویٹ کے ذریعے جانکاری دیتے ہوئے بتایا کہ ایک جعلساز‘ جس کی شناخت عبدالمجید شیخ ولد غلام محمد شیخ ساکن برتھنہ قمر واری کے بطور ہوئی ہے‘ کی گرفتاری عمل میں لائی گئی ہے۔انہوں نے بتایا کہ مذکورہ شخص رقومات کے عوض جعلی ڈومسائیل، انکم سرٹیفکیٹ، تاریخ پیدائش سرٹیفکٹس تیار کررہا تھا۔
پولیس ٹویٹ کے مطابق گرفتار شدہ شخص کے قبضے سے۳۴ڈومسائیل سرٹیفکیٹ‘۱۲؍انکم سرٹیفکیٹ‘سات برتھ سرٹیفکیٹ‘دو لیپ ٹاپ برآمد کرکے ضبط کئے گئے۔
پولیس نے اس ضمن میں ایف آئی آر زیر نمبر۷۵زیر دفعات۴۶۸/۴۲۰آئی پی سی کے تحت کیس درج کرکے مزید تحقیقات شروع کی۔