گیا میں بی جے پی لیڈر کے گھر پر بدمعاشوں نے بم سے کیا حملہ ، کوئی جانی نقصان نہیں

گیا، 31 مئی (یو این آئی) گیا ضلع کے ڈوبھی تھانہ علاقے کے مونی گا[؟]ں باشندہ بی جے پی لیڈر سنتوش گپتا کے گھر پربدمعاشوں نے دیر رات بم سے حملہ کیا۔
پولیس ذرائع نے آج یہاں بتایا کہ بدمعاشوں نے دیر رات بی جے پی لیڈر سنتوش گپتا کی رہائش گاہ پر بم سے حملہ کیا۔ تاہم واقعے میں کوئی جانی نقصان نہیں ہوا۔ لیکن گھر کے شیشے اور کھڑکیوں کو نقصان پہنچا ہے ۔ اطلاع ملتے ہی ڈوبھی تھانے کی پولیس موقع پر پہنچی اور معاملے کی جانچ شروع کردی۔ یہ سارا واقعہ سی سی ٹی وی کیمرے میں قید ہو گیا ہے جس کی بنیاد پر پولیس نے تفتیش شروع کر دی ہے ۔ سنتوش گپتا بی جے پی کے لیڈر ہیں اور اس سے قبل ضلع نائب صدر کے عہدہ پر فائز رہ چکے ہیں۔
اس حوالے سے بی جے پی رہنما سنتوش گپتا نے بتایا کہ وہ کل دیر رات گھر میں سو رہے تھے کہ اچانک انہوں نے دھماکے کی آواز سنی۔ جرائم پیشہ افراد کی جانب سے گھر پر یکے بعد دیگرے چار بم پھینکے گئے ۔ اس کے بعد بدمعاش ایک جھولا چھوڑ کر فرار ہو گئے ۔ جس میں پولیس نے دو زندہ بم برآمد کیا ہے ۔ پورے واقعے کی ویڈیو گھر میں نصب سی سی ٹی وی میں قید ہوگئی ہے ۔ انہوں نے بتایا کہ پولیس کو اطلاع دی گئی جس کے بعد پولیس نے گھر پہنچ کر زندہ بم برآمد کرکے ناکارہ بنا دیا۔