سرینگر//
جموں کشمیر کے لیفٹیننٹ گورنر‘ منوج سنہا کا کہنا ہے کہ سمارٹ سٹی پروجیکٹ کے تحت تیار ہو رہے سرینگر کے بازار بھی دہلی، چندی گڑھ اور دیگر شہروں کی طرح نظر آئیں گے ۔
سنہانے کہا کہ لوگ سرینگر میں ہوتے ہوئے ایسا محسوس کریں گے کہ جیسے وہ ممبئی یا دہلی میں ہیں۔
لیفٹیننٹ گورنر نے ان باتوں کا اظہار جمعہ کے روز پولو ویو مارکیٹ کا افتتاح کرنے کے بعد نامہ نگاروں کے ساتھ بات کرنے کے دوران کیا۔
سنہا نے کہا’’سمارٹ سٹی پروجیکٹ کے تحت لالچوک اور پرانے شہر میں بھی کئی ایسے بازار تیار کئے جا رہے ہیں‘‘۔ان کا کہنا تھا’’سرینگر بھی دلی، چندی گڑھ اور دیگر شہروں کی طرح نظر آئے اس طرح کی کوششیں کی جا رہی ہیں‘‘۔
ایل جی نے کہا کہ لوگ سرینگر میں ہوتے ہوئے ایسا محسوس کریں گے جیسے وہ ممبئی یا دہلی میں ہیں۔
پولو ویو مارکیٹ کو سمارٹ سٹی پروجیکٹ کے تحت تیار کیا گیا اور اس بازار کے دکانداروں نے مارکیٹ کی شکل و صورت بدلنے پر انتظامیہ کا شکریہ ادا کیا۔
اس دوران موصوف لیفٹیننٹ گورنر نے آبی گذر میں واقع مندر کا بھی دورہ کیا اور اس موقع پر سری نگر میونسپل کارپوریشن کے میئر جنید عظیم متو اور ایس ایم سی کمشنر‘ اطہر عامر خان اور دیگر افسران بھی ان کے ہمراہ تھے ۔
قابل ذکر ہے کہ۳ہزار کروڑ روپیے کے سمارٹ سٹی پروجیکٹ کے تحت سرینگر شہر کی بڑے پیمانے پر زیبائش و آرائش کی جا رہی ہے ۔
انتظامیہ نے اس پروجیکٹ کے تحت شہر میں سائیکل ٹریکس بچھائے ہیں اور مختلف مقامات پر فی گھنٹہ کے حساب سے سائیکل دستیاب رکھے ہیں اور اس کے علاوہ چارجز کے عوض سڑک کے کناروں پر کار پارکنگ بھی دستیاب رکھی گئی ہے ۔
کچھ روز قبل پولو ویو ہائی سٹریٹ کی تصویریں جب سوشل میڈیا پر وائرل ہوئی تھیں تو لوگوں نے ان کو کافی پسند کیا تھا اور اس مارکیٹ کو دیکھنے کا ارادہ ظاہر کیا تھا۔
تقریب کے حوالے سے ایک سرکاری بیان میں کہا گیا ہے لیفٹیننٹ گورنر منوج سِنہا نے آج سرینگر کے تین سمارٹ سٹی پروجیکٹوں اور ۲۵؍اَربن لوکل باڈیز ( یو ایل بی ) پروجیکٹوں کا اِفتتاح کیا۔
تین سمارٹ سٹی پروجیکٹوں میں سے پولو ویو کو پیڈ سٹرین اور نٹیڈ شاپنگ سٹریٹ میں تبدیل کیا گیا ہے ،آبی گذر شیو مندر کی تزئین و آرائش کی گئی ہے اور اُسے لوگوں کے لئے وقف کیا گیا ہے۔ سمارٹ ایڈ وانسڈٹریفک مینجمنٹ گاڑیوں کو سرینگر سمارٹ سٹی کے بیڑے میں شامل کیا گیا ہے ۔
آج جو اَربن لوکل باڈیز ( یوایل بی ) پروجیکٹس عوام کیلئے وقف ہیں ۔ان میں سے۱۱؍یوایل بی کے۱۶ترقیاتی منصوبے اور ۱۰؍یوا یل بی میں۹سالڈ ویسٹ مینجمنٹ کی سہولیات شامل ہیں۔
اِس موقعہ پر لیفٹیننٹ گورنر نے کہا کہ یہ پروجیکٹ شہری بنیادی ڈھانچے کو نمایاں طور پر فروغ دیں گے اور زندگی میں آسانی پیدا کریں گے ۔
لیفٹیننٹ گورنر نے کہا ’’ سرینگر کے قلب میں پولو ویو کو پیدل چلنے والوں پر مبنی ہائی سٹریٹ میں تبدیل کیا گیا ہے جو زیادہ لوگوں کو اَپنی طرف متوجہ کرے گا، رئٹیل سیل میں اِضافہ کرے گا، سیاحوں کے تجربے کو بہتر بنائے گا اور یہ علاقے کو مزید رہنے کے قابل بنائے گا۔‘‘
سنہا نے ملک کے دوسرے بڑے شہروں کے مساوی سہولیات پیدا کرنے کی کوششوں کا اِشتراک کرتے ہوئے کہا کہ پولو ویو مارکیٹ اَبھی شروعات ہے ۔ اُنہوں نے مزید کہا کہ آنے والے دِنوں میں سری نگر سمارٹ سٹی ریذیڈنسی روڈ ، لال چوک اور پرانے شہر جیسے علاقوں میں اِسی طرح کی مارکیٹ تیار کررہا ہے۔
لیفٹیننٹ گورنر نے کہا’’ شہری بنیادی ڈھانچے کی ترقی میں مجموعی نقطہ نظر اِنفرادی فلاح و بہبود ، لوگوں کیلئے مزید متنوع آمدنی ، بہتر خدمات کی فراہمی ، ٹرانسپورٹیشن ، صفائی ستھرائی او ردیر پا شہری ترقی کے مقاصد کے حصول کیلئے نئے مواقع پر مرکوز ہے۔‘‘
سنہا نے صوبہ کشمیر کے تمام ۴۰ یوایل بی کی اسپریشنز کو پورا کرنے کیلئے اُٹھائے گئے اقدامات پر بھی روشنی ڈالی۔اُنہوں نے کہا’’ ہم نے لوگوں کو شہروں کے مرکز میں رکھا ہے اور ترقیاتی او رسالڈ ویسٹ مینجمنٹ دونوں پروجیکٹوں سے لاکھوں شہری باشندوں کی زندگی کو بہتر بنانے کا بے مثال موقعہ فراہم کر رہے ہیں۔‘‘ایل جی نے مزید کہا کہ نئے اِفتتاح کئے گئے منصوبے شہری ماحول کو بہتر بنانے کے ہمارے عزم کا ثبوت ہے۔
لیفٹیننٹ گورنر نے گذشتہ کچھ برسوں میں جموںکشمیر کے ترقی کے سفر پر بات کرتے ہوئے یوٹی کی بے مثال ترقی کیلئے وزیر اعظم نریندر مودی جی کا شکریہ اَدا کیا۔اُنہوں نے کہا کہ آج معاشی ترقی رواں دواں ہے ، پروجیکٹوں کی تکمیل کی رفتار ۹گنا بڑھ گئی ہے اور سماج کا ہر طبقہ بااِختیار محسوس کر رہا ہے ۔
سنہا نے مزید کہا کہ شہری اَب مل کر پالیسیاں بنا رہے ہیں تاکہ بنیادی ڈھانچے کے منصوبوں کو لوگوں کی ضروریات کے مطابق تیار کیا جاسکے۔
لیفٹیننٹ گورنر نے یو ایل بی کے منتخب نمائندوں اور عام لوگوں پر زور دیا کہ وہ شہروں کی بحالی اور اُنہیں مزید متحرک ، مؤثر ، صاف ستھرا او ردیر پا بنانے کے مشن میں اِنتظامیہ کے ساتھ کندھے سے کندھا ملا کر کام کریں۔اُنہوں نے کہا کہ ہر شہری کے معیارِ زندگی کو بہتر بنانے کیلئے بنیادی ڈھانچے کو مضبوط بنیاد بنانا چاہیے۔اُنہوں نے کہا کہ ہمیں اِس بات کو یقینی بنانا چاہیے کہ بنیادی ڈھانچے کی ترقی۲۱ویں صدی کی ضروریات کو پورا کرے اور ہمارے شہروں کے اَنمول ورثے اور روایات کی عکاسی کرے۔اُنہوں نے شہروں کی خوبصورتی اور سوچھتا مہم میں زیادہ سے زیادہ عوام کی شرکت کی حوصلہ اَفزائی کرنے پر مزید زور دیا۔اُنہوں نے پولوویو میں دُکانداروں سے اِستفساری گفتگو کی اور ان کے تعاون پر ٹریڈرس ایسو سی ایشن کو تعرصیفی نشان پیش کیا۔
