ایشین گیمز سے پہلے چیمپئنز ٹرافی میں اصل امتحان ہوگا : ہرمن پریت

نئی دہلی//ہندوستانی مرد ہاکی ٹیم کے کپتان ہرمن پریت سنگھ نے کہا ہے کہ چنئی میں ہونے والی ایشین چیمپئنز ٹرافی آئندہ ایشین گیمز سے قبل ان کی ٹیم کا اصل امتحان ہوگا جہاں وہ براعظم کی سرفہرست ٹیموں کے خلاف اپنی تیاریوں کا جائزہ لے سکے گی۔
ایشین چیمپئنز ٹرافی 3 سے 12 اگست تک کھیلی جائے گی جب کہ ایشین گیمز ستمبر میں چین کے شہر ہانگ زو میں منعقد ہوں گے۔
منگل کو ہاکی انڈیا کے ساتھ بات چیت میں، ہرمن پریت نے کہا، "ہم اس ٹورنامنٹ میں یہ دیکھ سکیں گے کہ ہم ایشیائی کھیلوں میں ان ٹیموں کے خلاف کہاں کھڑے ہیں جن سے ہم مقابلہ کرنے جا رہے ہیں۔ یہ ایشین گیمز سے قبل ٹیم کے لیے اصل امتحان ہوگا۔
انہوں نے مزید کہا کہ "ایشین چیمپئنز ٹرافی چنئی 2023 ہمیں اپنے حریف ٹیموں کے بارے میں بھی بہتر سمجھ فراہم کرے گی۔ ہم ایشین گیمز کے لیے اچھی تیاری کر سکتے ہیں جہاں ہمارا مقصد گولڈ میڈل جیتنا اور پیرس 2024 اولمپکس کے لیے براہ راست کوالیفائی کرنا ہو گا”۔
ہندوستانی مردوں کی ٹیم نے 2011 میں منعقدہ افتتاحی ایڈیشن میں ایشین چیمپئنز ٹرافی کا خطاب جیتا تھا۔ اس کے بعد وہ 2016 میں بھی چیمپئن بنے جبکہ مسقط میں ہونے والے فائنل 2018 میں ہندوستان اور پاکستان مشترکہ فاتح بنے تھے۔ 2021 میں ڈھاکہ میں منعقدہ پچھلے ایڈیشن میں، ہندوستانی ٹیم نے کانسی کے تمغے کے ساتھ مہم کا خاتمہ کیا تھا۔
ہرمن پریت نے کہا، "ہم میں سے بہت سے لوگوں کے لیے، یہ پہلا موقع ہوگا جب ہم چنئی میں کھیل رہے ہوں گے۔ مجھے یاد ہے کہ ہمارے سینئرز نے چنئی میں 2007 کے ایشیا کپ کے بارے میں بات کی تھی، جو ہندوستان کے لیے ایک بہترین ٹورنامنٹ تھا۔” ہم نے ایک کامیاب مہم میں خطاب کا دفاع کیاتھا۔”