غلام نبی آزاد نے کانگریس پارٹی کے تئیں بے وفائی کا اعلان کر کے اپنا سیاسی قد اپنے ہاتھوں گھٹایا: سوز

سرینگر///
جموںکشمیر کانگریس کے سینئر لیڈر اور سابق مرکزی وزیر پروفیسر سیف الدین سوز نے منگل کے روز کہا کہ عوامی حلقوں میں یہ تاثر ہمہ گیر صورت اختیار کرچکا ہے کہ غلام نبی آزاد نے بالآخر کانگریس پارٹی کے ساتھ انتہائی بے وفائی کا ارتکاب کیا ہے ۔
سوزنے کہاکہ جس پارٹی نے عہدوں پر عہدے دے کر آزاد کو قدر و منزلت عطا کی تھی۔ عوامی حلقوں میں غلام نبی آزاد ہدف ملامت بن گیا ہے کیونکہ اس نے اسی پارٹی کے ساتھ بے وفائی اور دغا بازی کی ہے جس پارٹی نے اس کو عزت دی تھی اور گمنامی کے دائرے سے نکالا تھا۔
ایک بیان میں سوز نے کہا کہ ایک اور بات خصوصی طور آزاد کے خلاف گشت کر رہی ہے کہ اس نے سوچ سمجھ کر بی جے پی کو سیاسی فائدہ فراہم کرنے کا رول ادا کیا ہے اور اس عمل سے کانگریس پارٹی کو براہ راست نقصان پہنچانے کی کوشش کی گئی ہے !
کانگریسی لیڈر نے کہاکہ عوامی حلقے غلام نبی آزاد کو اس بات کیلئے بھی ہدف ملامت بنا رہے ہیں کیونکہ عوامی حلقے محسوس کر رہے ہیں کہ آزاد کو بہت جلد یہ معلوم ہو گا کہ اس پینترا بازی سے اُس کا قد کس قدر کر گیا ہے ۔
ان کے مطابق عوامی حلقے یہ بھی محسوس کر رہے ہیں کہ آزاد نے کانگریس پارٹی کو سیاسی طور نقصان پہنچانے کی کوشش کی ہے جس پارٹی نے اس کو غلام سے آزاد بنایا تھا !تاہم کانگریس پارٹی کے ساتھ وابستہ لوگ یہ بھی محسوس کر رہے ہیں کہ بالآخر پارٹی کوآزاد کے اخراج سے کوئی نقصان نہیں ہو گا کیونکہ کانگریس پارٹی ایک تحریک ہے جس میں لوگ شامل ہوتے رہیں گے ۔