نئی دہلی// دفاعی شعبے میں خودکفالت کو فروغ دینے کی سمت ایک اور بڑا قدم اٹھاتے ہوئے وزارت دفاع نے بھارت الیکٹرانکس لمیٹڈ (بی ای ایل) اور نیو اسپیس انڈیا لمیٹڈ (این ایس آئی ایل) کے ساتھ 5400 کروڑ روپے کے تین معاہدوں پر دستخط کیے ہیں۔ جس سے ملک کی دفاعی صلاحیتوں کو بڑھانے میں مدد ملے گی۔
پہلا معاہدہ بی ای ایل سے 1982 کروڑ روپے کی لاگت سے خودکار ایئر ڈیفنس کنٹرول رپورٹنگ سسٹم ‘پروجیکٹ آکاشتیر’ کی خریداری سے متعلق ہے ۔ بی ای ایل کے ساتھ دوسرا معاہدہ بحریہ کے لیے 412 کروڑ روپے کی لاگت سے سارنگ الیکٹرانک اسپورٹ میجر سسٹم کی خریداری سے متعلق ہے ۔
این ایس آئی ایل کے ساتھ دستخط شدہ تیسرا معاہدہ فوج کے لیے ہے اور اس کے تحت 2963 کروڑ روپے کی لاگت سے جدید مواصلاتی سیٹلائٹ جی سیٹ 7 بی خریدا جائے گا۔
یہ تینوں پروجیکٹ پروکیورمنٹ کے زمرے کے ہیں جو ہندوستان میں ڈیزائن کیے گئے ہیں اور اس سے دفاعی شعبے میں مقامی بنانے کے ساتھ ساتھ خود کفالت میں اضافہ ہوگا۔