یو ٹی کے لوگ اپنے جمہوری حقوق سے محروم ہیں: میر

ٹنگمرگ//
اپنی پارٹی سنیئر نائب صدر غلام حسن میر نے کہا ہے کہ جموں وکشمیر کے لوگوں کو اْن کے جمہوری حقوق سے محروم رکھاگیاہے۔
ٹنگمر گ کے گاؤں ہارد اچلو میں عوامی رابطہ پروگرام سے خطاب کرتے ہوئے میر نے کہاکہ مرکزی سرکار جموںکشمیر میں اسمبلی الیکشن کا انعقاد نہیں کر رہی جوکہ پچھلے کئی سالوں سے التوا میں ہے۔
میر نے کہا’’ایسا لگ رہ ہے کہ لوگوں کو جموں وکشمیر میں اسمبلی انتخابات کے ذریعے اپنی حکومت کا انتخاب کرنے کے جمہوری حقوق سے محروم رکھاگیا ہے‘‘۔انہوں نے مطالبہ کہاکہ جلد سے جلد اسمبلی انتخابات کرائے جانے چاہئیں تاکہ لوگوں کو اپنی حکومت کو بنانے کا موقع مل سکے۔
اپنی پارٹی کے سینئر نائب صدر نے کہا’’جموں کشمیر کے دونوں خطوں کے لوگ یک زباں اسمبلی انتخابات کے انعقاد اور جموں وکشمیر کے ریاستی درجے کی بحالی کا مطالبہ کر رہے ہیں جس کو یونین ٹیراٹری میں تبدیل کر دیاگیاہے‘‘۔
اپنے خطاب کے دوران انہوں نے کئی ترقیاتی مسائل، روزگارمواقعوں کا بھی حوالہ دیتے ہوئے لوگوں کو یقین دلایاکہ اگر اپنی پارٹی کوجموں وکشمیر میں اگلی سرکار بنانے کا موقع ملا تو سبھی خطوں میں یکساں ترقی کی جائے گی۔
میر نے کہا’’اگر ہمیں اگلی سرکار بنانے کا موقع ملا تو ہم بیوہ پنشن بڑھا کر ماہانہ ۵۰۰۰روپے کریں گے۔ اجولا یوجنہ اسکیم کے تحت سالانہ چار گیس سلنڈر مفت مہیا کئے جائیں گے۔ شادی کیلئے بچیوں کو مالی امداد فراہم کی جائے اور جموں وکشمیر کے لوگوں کے لئے قدرتی وسائل کا تحفظ یقینی بنایاجائے گا‘‘۔
اپنی پارٹی کے سینئر نائب صدر نے مزید کہاکہ اپنی پارٹی اس بات پر یقین رکھتی ہے کہ لوگوں کو یکساں مواقعے ملنے چاہئیں۔
اس موقع پر ڈی ڈی سی کنزر شیخ نذیر احمد، بی ڈی سی کنزر بیگ آفتاب، کاکا جی، ارشاد پنڈت، ایڈووکیٹ فیاض احمد، عرفان احمد وغیرہ بھی موجود تھے۔