بجٹ کا۳۵فیصد حصہ جموںکشمیر کے انفراسٹرکچر اور ترقی پر خرچ ہوگا:بی جے پی

سرینگر//
بھارتیہ جنتا پارٹی (بی جے پی) کے ترجمان اعلیٰ‘ سنیل سیٹھی نے مرکزی وزیر خزانہ نر ملا سیتا رمن کی طرف سے جموں و کشمیر کیلئے مالی سال۲۰۲۴تا۲۰۲۳کیلئے پیش کئے جانے والے بجٹ کو عوام دوست قرار دیتے ہوئے کہا کہ اس بجٹ کا۳۵فیصد حصہ جموں وکشمیر کے انفراسٹرکچر اور ترقی پر خرچ کیا جائے گا۔انہوں نے کہا کہ اس سے اندازہ لگایا جاسکتا ہے کہ جموں وکشمیر میں آنے والے برس کے دوران کتنی ترقی ہوگی۔
ترجمان اعلیٰ نے ان باتوں کا اظہار منگل کو یہاں ایک پریس کانفرنس سے خطاب کے دوران کیا۔
سیٹھی نے کہا’’جموںکشمیر کیلئے پیس کی جانی وال بجٹ کا۳۵فیصد حصہ یونین ٹریٹری کے انفراسٹرکچر اور ترقی پر خرچ ہوگا جس سے اندازہ لگایا جاسکتا ہے کہ آنے والے برس کے دوران یہاں کتنی ترقی ہوگی‘‘۔
ترجمان کا کہنا تھا کہ اس بجٹ کے تحت سو پور میں۲۵ہزار میٹرک ٹن کی گنجائش کا ایک کولڈ سٹور بنایا جائے گا جبکہ جموں کے نروال میں۲ہزار میٹرک ٹن کی گنجائش کا کولڈ اسٹور بنایا جائے گا۔
سیٹھی نے کہا کہ ان کولڈ سٹوروں سے میوہ سے وابستہ لوگوں کو کافی فائدہ ہوگا اور فصل کو خراب ہونے سے بچایا جائے گا۔انہوں نے کہا کہ بجٹ میں سمارٹ سٹی کے لئے سری نگر اور جموں کیلئے پانچ سو کروڑ روپیے رکھے گئے ہیں۔
بی جے پی کے ترجمان کا کہنا تھا کہ سرینگر میں سمارٹ سٹی کے پروجیکٹوں پر کام چل رہا ہے اور آنے والے دنوں میں پانی اور بجلی پر بھی کام ہوگا۔انہوں نے کہا کہ سرینگر میں میٹرو ٹرین پر کام اگلے برس سے شروع ہوگا جس سے لوگوں کو کافی سہولیت پہنچے گی۔
سیٹھی نے کہا کہ بجٹ میں خواتین کے لئے خاص خیال رکھا گیا ہے ۔انہوں نے کہا کہ خواتین کے لئے ایسی خاص دکانیں ہوں گی جہاں صرف خواتین ہی جا سکتی ہیں اور جن کو خواتین ہی چلا سکتی ہیں۔
ان کا کہنا تھا کہ دوسری طرف شعبہ سیاحت فروغ پا رہا ہے اور خواتین سیاحوں کی تعداد بڑھ رہی ہے جن کے تحفظ کو یقینی بنانے کیلئے گلابی گاڑیاں جن کے ڈرائیور خواتین ہی ہوں گی، کا بندو بست کیا جائے گا۔
بی جے پی ترجمان نے کہا کہ اگلے سال روز گار کے۴۰میلوں کا انعقاد عمل میں لایا جائے گا جس کے تحت نوجوانوں کو روز گار فراہم کیا جائے گا۔انہوں نے کہا کہ جل جیون مشن کے تحت پانی کے لئے پانچ ہزار کروڑ روپیے رکھے گئے ہیں تاکہ ہر گھر میں نل کا پانی میسر ہو۔
ان کا کہنا تھا کہ بجلی کی فراہمی کو مزید بہتر بنانے کے لئے بھی اچھی رقم رکھی گئی ہے ۔انہوں نے کہا کہ شعبہ سیاحت پر۶۰کروڑ روپیے صرف کئے جائیں گے ۔
بتادیں کہ مرکزی وزیر خزانہ نر ملا سیتا رمن نے پیر کو پارلیمنٹ میں جموں و کشمیر کیلئے مالی سال۲۰۲۴۔۲۰۲۳کیلئے ایک لاکھ۱۸ہزار۵سو کروڑ رویے کا بجٹ پیش کیا۔