رام بن :حکومتی پالیسیوں پر تنقید کرنے کی پاداش میں سرکاری استاد معطل

جموں//
جموں کشمیر کے ضلع رام بن میں سرکاری استاد کو سوشل میڈیا پر حکومتی پالیسیوں پر تنقید کرنا مہنگا پڑا ۔
معلوم ہوا ہے کہ ضلع ترقیاتی کمشنر کی ہدایت پر ٹیچر کو معطل کرکے جانچ کی خاطر ایک کمیٹی بھی تشکیل دی گئی۔
اطلاعات کے مطابق رام بن میں جمعے کے روز ایک سرکاری استاد کو سوشل میڈیا پر حکومتی پالیسیوں پر تنقید کرنے کی پادائش میں نوکری سے معطل کیا گیا۔
ضلعی ترقیاتی کمشنر رام بن‘مسرت الاسلام کی جانب سے جاری کئے گئے حکم نامے میں کہا گیا ہے کہ سوشل میڈیا سائٹوں پر ملازمین کی جانب سے حکومت کی پالیسیوں پر تنقید کے بارے میں حال ہی میں سرکار کی طرف سے دی گئی ہدایات کی خلاف ورزی پر جوگندر سنگھ جو کہ چندر کوٹ پرائمری اسکول میں استاد ہے کو فوری طورپرمعطل کیا گیا ۔
اسلام نے کہاکہ معطل ٹیچر کو چیف ایجوکیشن آفیسر رام بن کے دفتر کے ساتھ منسلک کیا گیا ۔
حکم نامے کے مطابق ڈسٹرکٹ مجسٹریٹ نے ایڈیشنل ڈسٹرکٹ ڈیلوپمنٹ آفیسر کی سربراہی میں تحقیقاتی ٹیم تشکیل دینے کا بھی حکم دیا ۔
بتادیں کہ چیف سیکریٹری ارون کمار مہتا نے۱۷فروری۲۰۲۳کو ایک میٹنگ کے دوران تمام انتظامی سیکریٹریوں کو سوشل میڈیا نیٹ ورک کی مستقل بنیاوں پر نگرانی کرنے اور مختلف سوشل میڈیا پلیٹ فارمز پر حکومتی پالیسیوں پر تنقید اور تبصرہ کرنے والے سرکاری ملازمین کی نشاندہی کرنے کی ہدایت جاری کیں۔