گول پولیس تھانے پر گرینیڈ حملے میں ملوث ملزمان کے دو مکان اور دکان ضبط

جموں//
سٹیٹ انوسٹی گیشن یونٹ (ایس آئی یو ) نے گول اندھ دھماکے میں ملوث افراد کے دو مکان اور دکان کو ضبط کیا۔
پولیس ذرائع کے مطابق سیل کئے گئے مکانات کو دہشت گرد سرگرمیوں کے لئے استعمال میں لایا گیا تھا۔
اطلاعات کے مطابق سٹیٹ انوسٹی گیشن یونٹ (ایس آئی یو )کی ٹیم نے جمعے کے روز گول اندھ دھماکے میں ملوث ملزمان کے دو مکان اور دکان کو اٹیچ کیا۔
ایک نوٹس کے مطابق منسلک کی گئیں جائیدادوں میں عبدالمجید لون کا ایک منزلہ مکان، محمد فاروق کا گھر اور شاہ الدین پڈیار کی ادویات کی دکان شامل ہے۔
پولیس ذرائع نے بتایا کہ ملزمان کے خلاف ایف آئی آر زیر نمبر۶۹کے تحت مقدمہ درج ہے اور وہ دہشت گردانہ سرگرمیوں میں ملوث رہے ہیں۔انہوں نے کہاکہ ضبط شدہ مکانات کو دہشت گردانہ کارروائیوں کے لئے استعمال میں لایا گیا تھا۔
اُن کے مطابق ضبط شدہ مکانات اور دکان کو کوئی فروخت نہیں کرسکتا اور نہ ہی ان میں تبدیلی لائی جاسکتی ہے ۔
واضح رہے کہ گزشتہ برس ۲؍ اگست کو رامبن کے گول علاقہ میں مشتبہ عسکریت پسندوں نے پولیس چوکی گول پر گرینیڈ سے حملہ کیا تھا۔گرینیڈ پولیس اسٹیشن کے باہر پھٹ گیا۔ اس حادثہ میں دو پولیس اہلکاروں کو معمولی چوٹیں آئی تھیں۔وہیں رامبن پولیس نے ۷۲ گھنٹوں کے بعد اس کیس کو حل کرنے کا دعوی کیا تھا۔پولیس نے اس حملے میں ملوث دو ملزمان کو گرفتار کرنے کا دعوی کیا تھا۔
ایس ایس پی رامبن، موہتا شرما نے ایک پرس کانفرنس کے دوران کہا تھا کہ پولیس پوسٹ پر ہوئے گرینیڈ حملہ کے فوری بعد ایک کیس۹/۲۰۲۲درج کرکے تحقیقات شروع کی گئی تھی۔
ایس ایس پی راجوری نے مزید کہا کہ پولیس نے ایک شخص شاہ دین پڈیار ولد عبدالستار پڈیار ساکنہ گول، رام بن کو فوری طور حراست میں لیا، جس نے گول علاقے میں عسکریت پسندی کو پھر سے ایک نئی جلا بخشنے کے لیے غزنوی فورس نام کی تنظیم کا سرگرم رکن ہونے کا اعتراف کیا۔