اندرونی علاقوں سے فوج ہٹانے میں کوئی حرج نہیں

جموں//
جموںکشمیر بھارتیہ جنتاپارٹی(بی جے پی) کے یوٹی صدر رویندر رینا نے پیر کے روز کہاکہ وزیر داخلہ امیت شاہ کی مداخلت کے بعد ہی انسداد تجاوزات مہم کو روک دیا گیا ہے ۔
رینانے کہاکہ یوٹی کے اندرونی علاقوں میں فوجی ہٹائی جائے تو کوئی حرج نہیں لیکن سرحدی علاقوں میں ابھی بھی فوج کی ضرورت ہے ۔
ان باتوں کا اظہار موصوف نے جموں میں نامہ نگاروں سے بات چیت کے دوران کیا۔
بی جے پی یونٹ صدر نے کہاکہ مرکزی وزیر داخلہ امیت شاہ کے ساتھ فون پر بات چیت کے بعد جموں وکشمیر میں انسداد تجاوزات مہم کو روک دیاگیا ۔
رینا نے کہاکہ ہم اس فیصلے کا خیر مقدم کرتے ہیں کیونکہ بی جے پی نے پہلے ہی واضح کیا کہ اس حوالے سے ایک ٹھوس پالیسی سامنے لائی جانی چاہئے تاکہ غریبوں کو راحت مل سکے ۔
بی جے پی لیڈر نے کہاکہ افرا تفری ٹھیک نہیں کیونکہ جموں کشمیر کے لوگ امن کے ساتھ اپنی زندگی گزارنا چاہتے ہیں۔اُن کے مطابق کشمیری ہو یا ڈوگرا ، مسلمان ہو یا ہندو سب کا بھلا ہی ہونا چاہئے ۔
جموں وکشمیر سے فوج کو واپس بلانے کے بارے میں پوچھے گئے سوال کے جواب میں رویندر رینا نے کہاکہ یوٹی کے اندرونی علاقوں سے فوج ہٹائی جائے تو کوئی حرج نہیں ۔انہوں نے کہاکہ اندرونی علاقوں میں سی آر پی ایف کی تعیناتی خوش آئند بات ہے لیکن سرحدی علاقوں میں فی الحال فوج تعینات رہے گی۔
رینا کے مطابق چونکہ جموں وکشمیر ایک بارڈر علاقہ ہے لہذا ایل او سی کے متصل علاقوں میں فوج کی تعیناتی ناگزیر ہے ۔