معراج البنیؐ :وادی میں روح پرور تقاریب

سرینگر/۱۸فروری
ہفتہ کو جموںکشمیر میں شب معراج کی تقاریب تزک واحتشام اور عقیدت و احترام کے ساتھ منائی گئیں۔
اس مناسبت سے وادی بھر میں چھوٹی بڑی مساجد ،خانقاہوں، اور زیارت گاہوں میں تقریبات کا انعقاد عمل میں لایاگیا‘ جہاں پر ختمات المعظمات اور دورود وازکار کی خصوصی محفلیں آراستہ ہوئیں۔وہیں امام و خطیب فلسفہ معراج پر روشنی ڈالی۔
کشمیر میں سب سے بڑی تقریب آثار شریف درگاہ حضرت میں منعقد ہوئی،جہاں عاشقان رسول صلی اللہ علیہ وسلم رات بھر عبادت و ریاضت میں محو رہ کر اللہ کے حضور اپنے گناہوں اور خطاؤں کی مغفرت طلب کریں گے۔
اس حوالے سے وادی کے طول عرض سے زائرین کی بڑی تعداد شب خوانی کی خاطر درگاہ حضرت بل پہنچی تھی۔
نماز عشاء کے بعد شب بیداری کا سلسلہ نماز فجر تک جاری رہا۔ شب خوانی کے دوران درگاہ شریف میں واعظ تبلیغ ،دورود ازکار ،ختمات المعظمات اور خصوصی دعائے مجالس کا اہتمام کیا گیا۔ آثار شریف درگارہ میں آج نماز عشاء رات کے دس بجے ادا کی گئی۔
درگاہ حضرت بل میں معراج النبی ﷺکی تقریب سعد کے موقعے پر ضلع انتظامیہ سرینگر نے مختلف سرکاری اداروں اور چند رضاکار انجمنوں کے اشتراک سے زائرین کو ہر ممکن سہولیات بہم رکھنے کیلئے خصوصی انتظامات کئے تھے جبکہ شہرو دیہات سے درگاہ حضرت بل آنے والے عقیدت مندوں کی سہولت کیلئے ٹریفک کے معقول انتظامات بھی کئے گئے تھے۔
شب معراج کی اس طرح کی روح پرور مجالس طلوع آفتاب تک جارہی،بعد میں نماز فجر سے ہر نماز پر وادی کے اطراف و اکناف سے آئے ہوئے فرزندان توحید موئے مقدس آنحضرت ؐ کے دیدار سے فیضیاب ہوتے رہیں۔
وہیں عقیدت مند فرش پر استادہ عرش کی طرف ہاتھ اٹھا کر اللہ کے حضور گڑ گڑاتے ہوئے دعائیں مانگ رہے تھے۔ ماہ رجب المرجب کی ۲۷ ویں شب کو اللہ تعالی نے اپنے محبوب حضرت محمد ؐکو معراج کا شرف عطا کیا۔اس بابرکت رات میں اللہ رب العزت نے اپنے حبیبؐ کو اپنے پاس بلایا اور ان سے ہم کلام ہوئے اور پانچ نمازوں کا تحفہ عطا کیا۔