’سرینگر؍۵نومبر
وزیر صحت سکینہ ایتو نے کہا ہے کہ انہوں نے بنگلہ دیش میں فوت ہونے والے سوپور کے فائنل ایئر ایم بی بی ایس طالب علم عدنان احمد راتھر کا معاملہ مرکزی وزیر صحت‘جے پی نڈاکے سامنے اٹھایا۔
نڈا آج وادی کے دورے پر تھے جہاں انہوں نے اونتی پورہ میں ایمز پر جاری کام کی پیش رفت کا جائزہ لیا۔
ایتو نے کہا کہ انہوں نے ذاتی طور پر متعلقہ دستاویزات اور رابطہ تفصیلات نڈا کے حوالے کیں اور طالب علم کی میت جلد جموں و کشمیر واپس لانے کے لیے ان کی مداخلت طلب کی۔
جموںکشمیر کی وزیر صحت نے کہا، ’’خاندان انتہائی مشکل وقت سے گزر رہا ہے۔ طالب علم کی والدہ، جو بنگلہ دیش میں ان کے ساتھ تھیں، ان کی موت کے بعد صدمے کی حالت میں ہیں۔ میں نے مرکزی وزیر صحت سے مداخلت کرکے میت جلد واپس لانے کو یقینی بنانے کی درخواست کی۔‘‘
ایتو نے مزید کہا کہ نڈا نے انہیں یقین دلایا ہے کہ وہ متعلقہ وزارت کے ساتھ یہ معاملہ اٹھائیں گے اور میت کی واپسی کے عمل میں ہر ممکن تعاون فراہم کریں گے۔
۔۔۔۔۔۔۔۔۔
