نہیں صاحب ہمیں کوئی اعتراض نہیں ہے اور … اور بالکل بھی نہیں ہے ۔ اعتراض ہو گا بھی تو … تو بھی ہماری سنے گا کون کہ …کہ ہم ٹھہرے چھوٹے منہ سے چھوٹی باتیں کرنے والے… لیکن… لیکن یہ بھی سچ ہے کہ اس چھوٹے سے منہ میں بھی بغیر ہڈی کے گوشت کا ایک ٹکڑا ہے… اور بغیر ہڈے والے اس گوشت کے ٹکڑے کو بھی بات کرنے کا حق ہے اور… اور سو فیصد ہے۔ سرکا ر نے… کشمیر کی سرکار نے سرکاری اراضی سے قابضین کو ہٹانے کی مہم شروع کی ہے اور… اور اب تک کہنے والوں کاکہنا ہے کہ سینکڑوں کنال اراضی کو باز یاب کر لیا گیاہے … سرکا ر کاکہنا ہے کہ جس کسی کے پاس بھی سرکار کی زمین ہو … ایک انچ بھی ہو ‘ اس سے وہ زمین حاصل کی جائیگی اور… اور اللہ میاں کی قسم حاصل کی جا رہی ہے… ہمیں اس پر بھی اعتراض نہیں ہے … سرکار یقینا اپنی زمین واپس حاصل کرے… بڑے بڑے مگر مچھوں سے کرے ‘ سیاستدانوں سے کرے‘ صنعت کاروں سے کرے‘ بڑے تاجروں سے کرے ‘ سابق اور حاضر سروس بیوروکریٹوں سے کرے… علیحد پسندوں سے کرے ‘ ملک دشمنوں سے کرے ‘ قوم دشمنوں سے کرے ‘ بندوق اٹھانے والوں سے کرے ‘ملک سے بغاوت کرنے والوں سے کرے ‘ ملک سے غداری کرنے والوں سے کرے‘ رشوت لے کر اور رشوت دے کر سرکاری زمین پر قبضہ کرنے والوں سے کرے… ان سب سے کرے ہمیں کوئی اعتراض نہیں ہوگا…الٹا ہم خوش ہو ں گے اور… اور اس لئے ہوں گے کہ ہمارا جاننا اور ماننا ہے کہ جو چیز آپ کی نہیںہے‘وہ آپ کی نہیں ہے‘ وہ آپ کی نہیں ہو سکتی ہے… اور بالکل بھی نہیں ہو سکتی ہے …لیکن صاحب ایک درخواست ہے‘ ایک عرضی سے ‘ ممکن ہے کہ…کہ سرکاری زمین کا کچھ حصہ لوگوں… عام لوگوں ‘ غریب لوگوں کے پاس بھی ہو … ان میں سے کچھ ایک نے اس پر اپنی چھوٹی سی دنیا بسائی ہو اور کچھ ایک نے اپنے عیال کاپیٹ پالنے کیلئے کوئی دکان سجائی ہو ‘کوئی کام شروع کررکھا ہو… ان سے سرکار اگر نرمی اور ہمدردی کا رویے اختیار کرے تو… تو صاحب سرکار کا کچھ نہیں جائیگا … اس کا کوئی نقصان نہیں ہو گا… الٹا غریب دعائیں دیں گے اور… اور غریب کی دعا بغیر کسی رکاوٹ یا جی ایس ٹی کے سیدھے اللہ میاں کے دربار میں پہنچ جاتی ہے اور… اور سو فیصد پہنچ جاتی ہے ۔ ہے نا؟
سرکاری زمین کے قابضین
