۲۰۲۲ میں سرینگر میں۴۸؍افراد کی سڑک حادثات میں موت واقع ہوئی:ایس ایس پی ٹریفک

سرینگر//
ایس ایس پی ٹریفک سری نگر مظفر احمد شاہ کا کہنا ہے کہ سری نگر میں۴۰فیصد سے زیادہ سڑک حادثات شالہ ٹینگ ، پانتھہ چوک بائی پاس سٹریچ میں رونما ہوتے ہیں۔
شاہ نے کہا کہ ہم اس میں اسٹیدی کر رہے ہیں جس کی رپورٹ بہت جلد ضلع مجسٹریٹ سری نگر کو پیش کی جائے گی۔
ایس ایس پی نے ان باتوں کا اظہار بدھ کو یہاں نامہ نگاروں کے سوالوں کے جواب دینے کے دوران کیا۔انہوں نے کہا کہ سرینگر میں ہو رہے سڑک حادثات کے سلسلے میں ہم ایک اسٹیدی کر رہے ہیں اور ہم نے کچھ بلیک سپارٹس کی نشاندہی کی ہے جہاں عام طور پر زیادہ تعداد میں حادثات رونما ہوتے ہیں۔
شاہ کا کہنا تھا’’جب ہم سرینگر شہر میں ہو رہے سڑک حادثات کا ڈاٹا دیکھتے ہیں تو ہم اس میں یہ دیکھتے ہیں زائد از۴۰فیصد حادثات شالہ ٹینگ ،پانتھہ چوک بائی پاس سٹریچ میں رونما ہوتے ہیں‘‘۔
ایسایس پی ٹریفک نے کہا کہ سرینگر میں ان حادثات کو کم کرنے کیلئے تمام تر امور پر فوکس کیا جا رہا ہے ۔انہوں نے کہا کہ حادثات کی روک تھام کو یقینی بنانے کیلئے ہم تمام تر وسائل بروئے کار لا رہے ہیں۔
شاہ کا کہنا تھا کہ شہر میں دو پہیہ والی گاڑی کی زیادہ تعداد ہے اور حادثات بھی ان ہی کے زیادہ ہوتے ہیں۔انہوں نے کہا کہ جون و جولائی میں جب اسکولوں کی چھٹی ہوئی تھی تو ان دو مہینوں کے دوران زیادہ تعداد میں سڑک حادثے ہوئے ہیں۔ان کا کہنا تھا کہ سال گذشتہ سرینگر میں۴۸؍افراد کی سڑک حادثات میں موت واقع ہوئی۔
ایس ایس پی نے کہا کہ سڑک حادثات کی روک تھام کو یقینی بنانے کیلئے لوگوں کے تعاون کی بھی اشد ضرورت ہے ۔انہوں نے کہا کہ ڈرائیو حضرات کی ذمہ داری کے کہ وہ ٹریفک قوانین کا خاص خیال کر ڈرائیونگ کریں۔