کپواڑہ ‘ ڈوڈہ سڑک حادثات میں ۵؍افراد ہلاک

سرینگر//
ڈوڈہ اور کپواڑہ میں دو الگ الگ سڑک حادثات میں پانچ افراد ہلاک جبکہ دو دیگر زخمی ہوئے۔
معلوم ہوا ہے کہ جموںکشمیر کے ڈوڈہ ضلع کے خانکوٹ علاقے میں ٹیمپو ٹرولر ڈرائیور کے قابو سے باہر ہو کر گہری کھائی میں جاگرا جس کے نتیجے میں تین شہری برسر موقع ہی ہلاک ہوئے جبکہ ایک کو زخمی حالت میں ہسپتال منتقل کیا گیا۔
سرکاری ذرائع نے بتایا کہ ضلع ڈوڈہ کے خانکوٹ علاقے میں منگل کی شام کو ایک گاڑی کھائی میں جاگری۔انہوں نے کہاکہ حادثے کی اطلاع ملتے ہی پولیس اور مقامی لوگ جائے موقع پر پہنچے اور زخمیوں کو علاج ومعالجہ کی خاطر نزدیکی ہسپتال منتقل کیا تاہم ڈاکٹروں نے تین مسافروں کو مردہ قرار دیا۔
ہلاک شدگان کی شناخت محمد اسلم ولد محمد اسماعیل محمد اسحاق ولد ابراہیم اور یاسین ولد غلام حسن وانی کے بطور ہوئی ہے۔
پولیس نے حادثے کی تصدیق کرتے ہوئے بتایا کہ اس سلسلے میں کیس درج کرکے مزید تحقیقات شروع کی گئی۔
ادھر شمالی ضلع کپواڑہ کے ہائینہ گاوں میں منگل کی سہ پہر کو دو گاڑیوں کے درمیان زور دار ٹکر کے باعث تین افراد شدید طورپر زخمی ہوئے، گر چہ تینوں کو علاج ومعالجہ کی خاطر نزدیکی ہسپتال لے جایا گیا تاہم وہاں پر تعینات ڈاکٹروں نے دو کو مردہ قرا ردیا۔
سرکاری ذرائع نے بتایا کہ کپواڑہ کے ہائینہ گاوں میں منگل کی سہ پہر کو فوجی گاڑی اور نجی کار کے درمیان شدید ٹکر ہوئی جس کے نتیجے میں تین افراد زخمی ہوئے۔
ذرائع نے کہاکہ زخمیوں کو علاج ومعالجہ کی خاطر نزدیکی ہسپتال منتقل کیا گیا تاہم وہاں پر تعینات ڈاکٹروں نے دو کو مردہ قرار دیا جبکہ تیسرے کو مزید علاج ومعالجہ کی خاطر سرینگر ریفر کیا گیا۔
پولیس نے معاملے کی نسبت کیس درج کرکے مزید تحقیقات شروع کی۔