دلباغ کی جموں میں سیکورٹی گرڈ کو مزید مضبوط بنانے کی ہدایت

جموں//
جموں کشمیر پولیس چیف دلبا غ سنگھ کی سربراہی میں جموں میں منگل کے روز ایک اعلیٰ سطحی میٹنگ منعقد ہوئی جس میں جموں صوبے کی سیکورٹی صورتحال کا جائزہ لیا گیا۔
ڈی جی پی نے اس موقع پر پولیس آفیسران کو ہدایت دی کہ وہ اپنے اپنے علاقوں میں سیکورٹی گرڈ کو مزید مضبوط کریں۔
پولیس کے ایک ترجمان نے بتایا کہ جموں میں پولیس سربراہ دلباغ سنگھ کی سربراہی میں ایک اعلیٰ سطحی میٹنگ منعقد ہوئی جس میں سپیشل ڈی جی سی آئی ڈی آر آر سوائن، سپیشل ڈی جی کرائم اے کے چودھری کے علاوہ اے ڈی جی پی جموں مکیش سنگھ نے شرکت کی۔
ترجمان نے کہاکہ میٹنگ کے آغاز میں پولیس سربراہ نے آفیسران پر بہتر پولیسنگ پر اپنی توجہ مرکوز کرنے کی ہدایت دی۔انہوں نے بتایا کہ سال ۲۰۲۲میں غیر معمولی اقدامات کی وجہ سے حالات بہتری کی جانب گامزن ہوئے۔انہوں نے مزید کہاکہ کچھ شعبوں کیلئے ہمیں موجودہ سال میں بہتر نتائج حاصل کرنے کے لئے مزید عزم کے ساتھ کام کرنے کی ضرورت ہے۔
ڈی جی پی نے این ڈی پی ایس کیسز کو نپٹانے کی خاطر بہتر نتائج حاصل کرنے پر آفیسران کی سراہنا کی۔ انہوں نے افسران پر زور دیا کہ وہ تفتیش اور استغاثہ کے معیار کو بہتر بنائیں تاکہ جرائم کے تمام مقدمات بالخصوص یو اے پی اے اور خصوصی جرائم کے مقدمات میں سزاوں کو بڑھایا جاسکے۔
ڈی جی پی نے این ڈی پی ایس /یو اے پی اے اور گھناؤنے جرائم کے مقدمات کو منطقی انجام تک پہنچانے کے لیے زونل اور رینج کی سطح پر باقاعدہ نگرانی کی خاطریومیہ میٹنگوں پر زور دیا۔
دلباغ نے افسران کو ہدایت کی کہ وہ خصوصی معاملات سے نمٹنے کیلئے اہلکاروں کی صلاحیتوں کو بہتر بنانے کے لیے اقدامات کریں۔
پولیس سربراہ نے میٹنگ کے دوران قومی شاہراوں اور بین ضلعی سڑکوں پر مزید چیکنگ اور ناکہ پوائنٹس کو بڑھانے پر زوردیا تاکہ سماج دشمن عناصر کے منصوبوں کو ناکام بنایا جا سکے۔