چیئرمین سٹیزن کوآپریٹیو بینک ‘سابق میئر اور جنید میر کی ایل جی سے ملاقات

سرینگر//
چیئر مین دی سٹیزن کوآپریٹیو بینک لمٹیڈ جموں پروین کمار شرما نے آج راج بھون میں لیفٹیننٹ گورنر منوج سِنہا سے ملاقات کی۔
چیئر مین کے ہمراہ بینک کے دائریکٹر ایڈووکیٹ ایس سریندر سنگھ اور منیجنگ ڈائریکٹر روی کانت تھے ، نے لیفٹیننٹ گورنر کو بینک کے کام کاج اور لوگوں تک خدمات کی توسیع کے بارے میں جانکاری دی۔
سابق میئر جے ایم سی چندر موہن گپتا نے لیفٹیننٹ گورنر کو عوامی اہمیت کے مختلف مسائل او رمیونسپل کاپوریشن کے بہتر کام کاج سے متعلقہ اَمور سے آگاہ کیا۔
دریں اثنا‘ بی جے پی ایس ٹی مورچہ جموںوکشمیر کے ایک وفدجس کی قیادت اس کے صدر چودھری روشن حسین کررہے تھے ‘ نے تعلیم سے متعلق قبائلی طبقے کے اننت ناگ‘ کپواڑہ اور گاندربل میں نئے گجر بکروال ہوسٹل کا اِفتتاح ، قبائلی مشاورتی کونسل اور بورڈ کی تشکیل ، کشمیر میں گجر بھون وغیرہ مختلف مسائل پر تبادلہ خیال کیا۔
لیفٹیننٹ گورنر نے وفد کے اَرکان کے ساتھ بات چیت کرتے ہوئے کہا کہ حکومت قبائلی طبقوں کی فلاح و بہبود اور ترقی کے پُر عزم ہے۔
جموںوکشمیر ورکرس پارٹی ( جے کے ڈبلیو پی ) کے صدر میر جنید نے بھی لیفٹیننٹ گورنر سے ملاقات کی اور اُنہوں نے لیفٹیننٹ گورنر کو کوآپریٹیو سوسائیٹیوں ، کسان براد ری، فروٹ گروئورس اور زرعی صنعت کاروں کے مختلف مسائل گوش گزار کئے۔
بعد اَزاں، سٹیٹ ایگزیکٹیو ممبر بی جے پی جموںوکشمیر یوٹی رمیش شرمااور نائب صدر بی جے پی ضلع رام بن سورن کشور سنگھ نے بھی لیفٹیننٹ گورنر منوج سِنہا سے ملاقات کی اور رام بن کے لوگوں سے متعلق دیگر مسائل کے علاوہ ڈسٹرکٹ ہسپتال رام بن کو مضبوط کرنے، کچھ سکولوں میں عملے میں اضافہ، وی ڈی جی کو دوبارہ فعال کرنے سے متعلق مسائل اور مطالبات کا ایک یاد داشت پیش کیا۔
لیفٹیننٹ گورنر نے وفود کو یقین دِلایا کہ بات چیت کے دوران ان کی طرف سے پیش کردہ تمام مسائل او رمطالبات پر غور کیا جائے گا۔