وزیر اعلیٰ نے بودھ گیا میں بودھ مذہبی پیشوا دلائی لامہ سے ملاقات کی

پٹنہ//وزیر اعلیٰ جناب نتیش کمار نے آج بودھ گیا واقع تبتی مونسٹی میں بودھ مذہب کے رہنما دلائی لامہ جی سے ملاقات کی۔ ملاقات کے دوران محترم دلائی لامہ جی کو شال اور بھگوان بدھ کا مجسمہ پیش کر کے ان کا خیر مقدم کیا۔ دلائی لامہ جی نے وزیر اعلیٰ کو شال اور بدھ کی پینٹنگ پیش کی اور دعائیں دیں ۔اس دوران وزیر اعلیٰ اور دلائی لامہ جی کے درمیان تقریباً نصف گھنٹے تک بودھ مذہب اور روحانیت پر تفصیلی گفتگوہوئی۔ وزیر اعلیٰ نے ویشالی میں زیر تعمیر ‘ بدھ سمیک درشن میوزیم ’کی تعمیر کاکام مکمل ہونے پر اس کے افتتاح کیلئے ، محترم دلائی لامہ جی سے گزارش کی ، جس پر انہوں نے اپنی رضا مندی ظاہر کی۔
ملاقات کے بعد وزیر اعلیٰ نے بودھ گیا کے مہابودھی مندر میں پوجا کر کے ریاست کی امن و سلامتی اور خوشحالی کے لیے بھگوان بدھ سے دعا کی۔
مہابودھی مندر میں پوجا کرنے کے بعد نامہ نگاروں سے بات کرتے ہوئے وزیر اعلیٰ نے کہا کہ ان دنوں بڑی تعداد میں عقیدت مند یہاں آتے ہیں،گھومتے ہیں اور درشن کرتے ہیں۔ لوگوں کو یہاں مذہبی باتیں بتائی جاتی ہیں۔ یہ ایک روایت ہے ۔ درمیان میں کورونا کے سبب دو تین سال متاثررہا،لیکن اس مرتبہ پھر بڑی تعداد میں لوگ یہاں آئے ہیں۔ جو اطلاعات موصول ہوئی ہیں ان کے مطاتق تقریباً ایک لاکھ عقیدت مند آچکے ہیں۔یہ بڑی خوشی کی بات ہے ۔ آپ کو تو معلوم ہی ہے کہ بہار میں کورونا کے مریضوں کی تعدادصفر ہو گئی تھی، لیکن کچھ لوگ باہر سے یہاں آئے ہیں، تو یہاں پر بھی کچھ کورونا کے مریض دیکھے گئے ہیں۔