وقف بورڈ تجاوزات پر قرطاس ابیض جاری کیاجائیگا

سرینگر//
جموںکشمیر وقف بورڈ کی چیئرپرسن‘ڈاکٹر درخشاں اندرابی نے پیر کو کہا کہ بورڈ آنے والے ۸سے ۹ ماہ میں ۷۵ سال کی تجاوزات پر قرطاس ابیض( وائٹ پیپر )جاری کرے گا۔
ڈاکٹر اندرابی نے کہا’’وقف میں ۷۵ سال سے تجاوزات پر وائٹ پیپر جاری کریں گے۔ اس میں۸ سے ۹ ماہ لگیں گے۔ سب کچھ عوام کے سامنے لایا جائے گا بیٹا‘‘ ۔
وقف بورڈ چیئر پرسن سرینگر کے علاقے خانیار میں درگاہ دستگیر صاحب کے دورہ کے موقع پر صحافیوں سے بات کر رہی تھیں۔
ڈاکٹر اندرابی نے کہا کہ قرطاس ابیض جاری کرنے سے لوگ مایوس نہیں ہوں گے کیونکہ انہی کا اصرار تھا اور خواہش تھی کہ ایسا کیا جائے۔انہوں نے کہا کہ اس سلسلے میں بورڈ کو لوگوں کا ساتھ ہے اور اسی کی وجہ سے بورڈ آگے بڑھ رہا ہے ۔
وقف بورڈ چیئر پرسن نے مزید کہا کہ وقف کسی سیاسی اثر میں آئے بغیر کام کر رہا ہے۔
ایک سوال پر، وقف چیئرپرسن نے کہا کہ کینسر ہسپتال سرینگر میں جلد ہی قائم کیا جائے گا اور اسے وقف زمین پر تعمیر کیا جائے گا۔ انہوں نے مزید کہا کہ وقف اراضی پر جلد ہی کینسر ہسپتال بنایا جائے گا، انشاء اللہ لیکن اس میں کچھ وقت لگے گا۔
ڈاکٹر اندرابی نے کہا ’’جب اس سلسلے میں کوئی پیش رفت ہوتی ہے تو آپ کو مطلع کیا جائے گا‘‘۔انہوں نے مزید کہا’’ہم فی الحال دوسرے منصوبوں میں مصروف ہیں‘‘۔