کھرگے نے شیشی تھرورکو شکست دی ‘۲۴ برسوں میں پہلے غیر گاندھیائی کانگریسی صدر بن گئے

نئی دہلی//
کانگریس کے صدر کے عہدے کیلئے ہونے والی ووٹنگ میں پارٹی کے سینئر لیڈر ملکارجن کھرگے کو منتخب قرار دے دیا گیا ہے ۔ انہوں نے اپنے مد مقابل‘ ششی تھرور کو بڑے فرق سے شکست دی، جیسا کہ امکان ظاہر کیا گیا تھا۔
کانگریس کے الیکشن شعبہ کے انچارج مدھوسودن مستری نے بدھ کو پارٹی ہیڈکوارٹر میں ایک پریس کانفرنس میں انتخابی نتائج کا اعلان کرتے ہوئے کہا کہ کھرگے۶۸۲۵ووٹوں سے جیت گئے ہیں۔
مستری نے کہا کہ پیر کو ہونے والی ووٹنگ میں کل۹۳۸۵ووٹ ڈالے گئے ۔ کھرگے کو۷۸۹۷اور تھرور کو۱۰۷۲ووٹ ملے ۔ ووٹنگ میں۴۱۶ووٹوں کو کالعدم قرار دیا گیا ہے ۔
الیکشن میں کسی قسم کی بے ضابطگی کی شکایت کو مسترد کرتے ہوئے مستری نے کہا کہ ووٹوں کی گنتی تمام ووٹوں کو مدنظر رکھ کر کی گئی ہے اور اس سے بھی یہ اندازہ نہیں لگایا جا سکتا کہ کس امیدوار کو کس حلقے سے کم یا زیادہ ووٹ ملے ہیں۔ اس سے یہ امکان بھی ختم ہو جاتا ہے کہ جن مندوبین کو اپنے ووٹ کی وجہ سے کسی قسم کی پریشانی کا سامنا کرنا پڑے گا۔
کھرگے کی جیت پہلے سے ہی یقینی سمجھی جا رہی تھی اور انہیں پورے ملک میں کانگریس قیادت کے امیدوار کے طور پر دیکھا جا رہا تھا۔ ان کے مد مقابل ششی تھرور نے بھی درمیان میں شکایت کی تھی کہ وہ جس ریاست میں صدر کے انتخابی مہم کے لیے جا رہے ہیں اس ریاست کے صدر بھی ان سے ملنے نہیں آ رہے ہیں۔
مستری نے کہا’’کانگریس کے آئین کے آرٹیکل۱۸ڈی کے تحت میں مدھوسودن مستری، الیکشن انچارج، اعلان کرتا ہوں کہ ملکارجن کھرگے اس الیکشن میں کانگریس کے صدر منتخب ہوئے ہیں‘‘۔
صدر کے عہدے کیلئے۱۷؍اکتوبر کو ووٹنگ ہوئی تھی اور آج پولنگ ایجنٹس کے سامنے دونوں امیدواروں کے ووٹوں کی گنتی کی گئی۔ کانگریس صدر کے انتخاب کیلئے دو امیدوار مسٹر کھرگے اور تھرور میدان میں تھے ۔
نامہ نگاروں کے سوال پر مستری نے کہا کہ پارٹی نئے صدر کا خیرمقدم کرے گی اور جس طرح سابق صدر راہل گاندھی کا پارٹی صدر بننے پر استقبال کیا گیا تھا‘اسی طرح کا پروگرام کھرگے کی تاجپوشی کے لیے بھی بنایا جا رہا ہے ۔
کھرگے ‘سیتارام کیسری کے بعد نہروگاندھی خاندان سے باہر کے پہلے شخص ہیں جو کانگریس کے صدر بنے ہیں۔ تقریباً ڈھائی عشروں کے بعد گاندھی،نہرو خاندان کے باہر سے کوئی شخص پارٹی میں کانگریس کی قیادت کرنے جا رہا ہے ، لیکن ایسا مانا جا رہا ہے کہ کرناٹک کے پرانے لیڈر کھرگے کانگریس کے فرسٹ فیملی کے قابل اعتماد شخص ہیں۔ وہ ان کے ساتھ صرف پارٹی کو ہم آہنگ کرتے ہوئے آگے بڑھیں گے ۔ ان کے سامنے پہلی آزمائش ہماچل اور گجرات میں اس سال کے آخر میں ہونے والے قانون ساز انتخابات ہیں۔
ڈاکٹر تھرور نے ایک ٹویٹ میں کھرگے کو ان کی جیت پر مبارکباد دی ہے ۔
اس دوران کانگریس صدر سونیا گاندھی اور اتر پردیش کی پارٹی جنرل سکریٹری انچارج پرینکا گاندھی وڈرا نے کھرگے کو کانگریس صدر منتخب ہونے پر ان کی رہائش گاہ پر جاکر مبارکباد دی۔
سونیا گاندھی نے کھرگے کو مبارکباد دی اور انہیں پھولوں کا گدستہ پیش کیا۔ وڈرا نے بھی کھرگے کو مبارکباد دی۔ راہل گاندھی بھارت جوڑو یاترا میں مصروف ہیں لیکن انہوں نے بھی ٹویٹ کرکے کھرگے کو صدر بننے پر مبارکباد دی ہے ۔