۲۶ستمبر سے بمنہ میں بچہ ہسپتال چالو ہو جائیگا

سرینگر//
سرینگر کے بمنہ علاقے میں ۵۰۰بستروں پر مشتمل بچوں کے ہسپتال کو ۲۶ستمبر سے کام کرناشروع کر دیا جائے گا۔
ایک اہلکار نے بتایا کہ تمام مشینری اور دیگر آلات کو ہسپتال منتقل کر دیا گیا ہے اور اسے پیر سے فعال کر دیا جائے گا۔انہوں نے کہا کہ ہسپتال میں مشینری اور تمام آلات نصب کر دیے گئے ہیں تاکہ مریضوں کو تکلیف نہ ہو۔
اہلکار نے کہا کہ پیر کی صبح۱۰بجے سے جی بی پنتھ میں او پی ڈی اور داخلے بند ہو جائیں گے اور اسی وقت چلڈرن ہسپتال بمنہ میں مریضوں کا داخلہ شروع ہو جائے گا۔
قابل ذکر بات یہ ہے کہ ہسپتال پر ابتدائی طور پر کام ۲۰۱۳میں شروع کیا گیا تھا لیکن اس وقت کے وزیراعلیٰ مفتی محمد سعید نے اکتوبر۲۰۱۵ میں توسیع دی اور۵۰۰ بستروں پر مشتمل ماں اور بچے کے ہسپتال کا سنگ بنیاد رکھا۔
۲۰۱۹میں، حکومت نے۲۰۰ بستروں پر مشتمل میٹرنٹی ہسپتال اور ۳۰۰ بستروں والے پیڈیاٹرک ہسپتال کو مکمل طور پر ۵۰۰ بستروں والے چلڈرن ہسپتال میں تبدیل کرنے کی منظوری دی۔کئی ڈیڈ لائنز ہونے کے بعد، ہسپتال مکمل ہو گیا اور او پی ڈی سروسز نے گزشتہ سال اکتوبر میں کام کرنا شروع کر دیا۔