’اراضی مالکان کو ستمبر کے آخر تک ڈیجیٹل لینڈ پاس بک فراہم ہوں گے‘

سرینگر//
جموںکشمیر کے چیف سیکریٹری ‘ڈاکٹرارن مہتا کا کہنا ہے کہ یونین ٹریٹری کے تمام ارضی مالکان کو ماہ رواں کے آخر تک ڈیجیٹل لینڈ پاس بک فراہم کئے جائیں گے ۔
ڈاکٹر مہتا نے کہا کہ یہ پاس بک تین زبانوں ہندی اردو اور انگریزی میں ہوں گے ۔
چیف سیکریٹری نے ان باتوں کا اظہار جمعرات کو یہاں میڈیا کے ساتھ بات کرنے کے دوران کیا۔
چیف سیکریٹری نے کہا’’ستمبر کے آخر تک جتنے بھی اراضی مالکان ہیں ان کو ڈیجیٹل لینڈ پاس بک تین زبانوں ہندی، اردو اور انگریزی میں فراہم کئے جائیں گے ‘‘۔ان کا کہنا تھا’’پہلی بار ایسا ہوگا کہ پاس بک آپ کو اس زبان میں ملے گا جس کو آپ سمجھ سکیں گے کیونکہ پہلے جس زبان میں لکھا جاتا تھا کسی کے سمجھ میں نہیں آتا تھا کہ کیا لکھا ہوا ہے ‘‘۔
ڈاکٹر مہتا نے کہا کہ جموں وکشمیر میں سپورٹس ایونٹس اہتمام کرنے کا مقصد نوجوانوں کو منشیات سے درو رکھنا ہے ۔انہوں نے کہا’’جو منشیات کاشکار ہوئے ہیں ان کو ہماری مدد کی ضرورت ہے اور حکومت نوجوانوں کو منشیات کی لت میں پڑنے سے روکنے کے لئے تمام تر کوششیں کر رہی ہیں اور سپورٹس ایونٹس کا اہتمام اسی سلسلے کی ایک کڑی ہے ‘‘۔ان کا کہنا تھا کہ منشیات سماج کے لئے بہت بڑا چلینج بن گیا ہے ۔
قومی شاہراہ پر میوہ گاڑیوں کے رکنے کے بارے میں پوچھے گئے ایک سوال کے جواب میں چیف سکریٹری نے کہا کہ برسات کے موسم میں تھوڑی بہت پرابلم ہوئی تھی اس کو دور کیا جا رہا ہے ۔
موسم سرما کے دوران بجلی کی فراہمی کے بارے میں انہوں نے کہا کہ بجلی کی سپلائی بہت زیادہ ہے اور سال گذشتہ بھی سرما کے دوران کوئی مسئلہ نہیں ہوا تھا۔
فلم سٹی کے بارے میں ان کا کہنا تھا کہ اس پر کام چل رہا ہے ۔