نصاب میں ضروری تبدیلیاں کی جائیں گی :سنہا

نصاب میں ضروری تبدیلیاں کی جائیں گی :سنہا
کٹرا//
جموں کشمیر کے لیفٹیننٹ گورنر‘ منوج سنہا نے کہا ہے کہ یو ٹی میں قومی تعلیمی پالیسی کے مطابق نصاب میں ضروری تبدیلیاں کی جائیں گی ۔
سنہا شری ماتا ویشنو دیوی شرائن بورڈ (ایس ایم وی ڈی ایس بی) کے ۳۷ ویں یوم تاسیس اور شری ماتا ویشنو دیوی گروکل چرن پڈوکاکٹرہ کے ۱۲ویں سالانہ دن کی تقریب سے شری ماتاویشنو دیوی یونیورسٹی کے ماتریکا آڈیٹوریم میں خطاب کررہے تھے۔
لیفٹیننٹ گورنر نے کہا ’’ ہماری کوشش ہونی چاہیے کہ قومی تعلیمی پالیسی کے مطابق نصاب میں ضروری تبدیلیاں کی جائیں‘‘۔
سنہا نے کہا کہ گذشتہ دو برسوں میں ہم نے قومی تعلیمی پالیسی کے مطابق جموں کشمیر میں تعلیمی نظام کو نئی شکل دینے کی کوشش کی ہے۔ سکول سے یونیورسٹی کی سطح تک تمام اداروں کو شعور میں تبدیلی کے مراکز کے طور پر تیار کرنے کیلئے کام کیا گیا ہے۔
لیفٹیننٹ گورنر نے کہا کہ آج ہمارے نوجوان ذاتی خواہش کے ساتھ ساتھ معاشرے کی خدمت کو ترجیح دے رہے ہیں اور یہ ایک طویل عرصے کے بعد ایک قابل ذکر تبدیلی ہے۔
سنہا نے کہا کہ ہم نے گذشتہ دو برسوں میںمتعدد اہم اقدامات شروع کئے ہیں، جن میں فلیگ شپ پروگرام ’’سٹوڈنٹ ٹیچر مینٹرشپ‘‘شامل ہے جو سیکھنے کے فرق کی نشاندہی کرکے سیکھنے کے نتائج کو بڑھانے کی جانب ایک انقلابی قدم ہے۔ شری ماتا ویشنو دیوی گروکل میں بھی اساتذہ کو طلباء کی ضروریات، صلاحیت اور دلچسپیوں کا اندازہ لگا کر اپنے تدریسی طریقہ کار کو یکسر تبدیل کرنے کا موقعہ ملے گا۔ اُنہوں نے مزید کہا کہ یہ نصاب میں ہم آہنگ تبدیلیوں کا باعث بنے گا‘‘۔
لیفٹیننٹ گورنر نے مرکزی سنسکرت یونیورسٹی کے ساتھ افیلیشن اور گروکل کی توسیع کے لئے اِنتظامیہ کی کوششوں کی تعریف کی جہاں تک طلبہ کی تعداد کا تعلق ہے۔
سنہا نے ہر ماہ شری ماتا ویشنو دیوی شرائین پر آنے والے ۸سے۹ لاکھ عقیدت مندوں کی ضروریات کو پورا کرنے کے لئے اٹھائے گئے اقدامات پر بھی روشنی ڈالی۔
لیفٹیننٹ گورنر نے کہا کہ اس موقعہ پر ہمیں ایس ایم وی ڈی شرائن بورڈ کے آئین میں سابق جموں و کشمیر کے سابق گورنر شری جگموہن جی کے کلیدی کردار کو بھی یاد رکھنا چاہیے۔
سنہا نے کہا کہ عقیدت مندوں کے بھاری رش کو مدنظر رکھتے ہوئے ہم ان کی یاترا کو بغیرکسی پریشانی بنانے کیلئے سہولیات کو مسلسل بہتر کر رہے ہیں۔ گزشتہ دو برسوں میں بہتر سہولیات اور وسائل کیلئے نئے پروجیکٹوں کی منظوری دی گئی ہے ۔لیفٹیننٹ گورنر نے کہا کہ سکائی واک پر کام دسمبر تک مکمل ہو جائے گا۔
نیشنل ہائی وے لاجسٹکس مینجمنٹ لمیٹڈ (این ایچ ایل ایم ایل ) اور کٹرا ڈیولپمنٹ اَتھارٹی کے درمیان۳۰ ؍اگست ۲۰۲۲ ء کو دستخط کئے گئے مفاہمت نامے کے تحت ہیلی پیڈ، ریلوے اسٹیشن، بس اسٹینڈ، آٹو اسٹینڈ، پارکنگ، فائیو اسٹار جیسی خدمات لانے والے عقیدت مندوں کے لئے اپنی نوعیت کا ایک انٹر ماڈل سٹیشن بنائے گا۔
لیفٹیننٹ گورنر نے دنیا بھر سے آنے والے زائرین کو جدید ترین سہولیات کی فراہمی کو یقینی بنانے اور مقامی معیشت اور زیارت گاہوں کے درمیان تعلق کو مزید مضبوط بنانے کیلئے کئے گئے بہت سے نئے اقدامات کی فہرست دیتے ہوئے کہا کہ حکومت روحانی سیاحتی سرکٹ کی ترقی اور فروغ کیلئے کام کر رہی ہے۔
سنہا نے کہاکہ روحانی ثقافتی ورثے کے تحفظ اور احیاء کے لئے کوششیں کی جا رہی ہیں اور ممتاز روحانی اور مذہبی مقامات جیسے پُرمنڈل۔ اتربھنی، مانسر۔ سرنسر اور شیو کھوری کو ملک کے مذہبی سیاحتی سرکٹ پر لانے کی کوشش کی جا رہی ہے جس سے مقامی لوگوں کیلئے روزی روٹی کے مواقع بھی پیدا ہوں گے۔