وفاقی وزیر داخلہ رواں ماہ جموں کشمیر کا دورہ کریں گے

سرینگر//
جموں کشمیر میں بھارتیہ جنتا پارٹی(بی جے پی) کو مزید متحرک اورفعال بنانے کیلئے مرکزی وزیر داخلہ امت شاہ کا۲روزہ دورہ جموںکشمیر ماہ ستمبر کے آخرتک متوقع ہے۔
امیت شاہ دورے کے دوران جموںمیں ۲جبکہ کشمیر میں ایک عوامی ریلی سے خطاب کریں گے۔
ایک میڈیا رپورٹ میں کہا گیا ہے کہ اپنے۲روزہ دورے کے دوران مرکزی وزیر داخلہ جموں وکشمیرکی سلامتی صورتحال کا جائزہ لینے کے ساتھ ساتھ یہاں جاری مرکزی اسکیموں اور مختلف ترقیاتی کاموں کی عمل آوری، نیز پیش رفت کے بارے میں بھی جانکاری حاصل کریں گے۔
رپورٹ کے مطابق وزیر داخلہ نے اس دورے کے لئے اپنی رضامندی ظاہر کی ہے اور دورے کے پروگرام کا تعین بی جے پی کی جے اینڈ کے یونٹ اور امیت شاہ کے دفتر کے باہمی اشتراک سے کیا جائے گا۔
توقع ہے کہ تاریخوں کا جلد اعلان کیا جائے گا۔جموں وکشمیر میں قیام کے دوران مرکزی وزیر داخلہ جموں وکشمیر بی جے پی یونٹ کے سینئر لیڈران کیساتھ بھی ملاقات کریں گے جن میں آئندہ کے لائحہ عمل پر غور و خوض ہونے کا امکان ہے۔
میڈیا رپورٹس کے مطابق یہ سرگرمیاں وزیر داخلہ کے سرکاری شیڈول کے علاوہ ہوں گی جس میں یونیفائیڈ کمانڈ سمیت سیکورٹی ایجنسیوں کے اعلیٰ حکام کیساتھ سیکورٹی جائزہ ملاقاتیں اور بعض سرحدی علاقوں کا دورہ شامل ہو سکتا ہے۔
خیال رہے کہ مرکزی وزیر داخلہ امیت شاہ کا اس سال جموں و کشمیر کا یہ دوسرا دورہ ہوگا۔ انہوں نے ۱۸؍اور ۱۹ مارچ کو یونین ٹیریٹری کا دورہ کیا تھا جس دوران انہوں نے سنٹرل ریزرو پولیس فورس (سی آر پی ایف) کے یوم تاسیس میں شرکت کی تھی۔
شاہ نے گزشتہ سال ۲۳ سے ۲۶؍ اکتوبر تک جموں و کشمیر کا ۴روزہ دورہ کیا تھا‘ جو۵؍اگست۲۰۱۹ سابق ریاست جموں و کشمیر کی خصوصی حیثیت کی منسوخی کے بعد یونین ٹیریٹری کا ان کا پہلا دورہ تھا۔