پہلے میچ میں وراٹ نے اگر نصف سنچری بنائی تو سب کے منہ بند ہو جائیں گے: شاستری

بنگلورو// ہندوستان کے سابق کوچ روی شاستری نے منگل کے روز کہا کہ اگر وراٹ کوہلی ایشیا کپ کے پہلے میچ میں نصف سنچری بنا لیتے ہیں تو باقی کے ٹورنامنٹ کے لیے "سب کا منہ بند ہو جائے گا”۔
شاستری نے ایشیا کپ سے قبل منعقدہ ایک پریس کانفرنس میں کہا، ”اب وہ پرسکون دماغ کے ساتھ واپس آئیں گے۔ میدان سے باہر ہو چکے ہیں۔ اب وہ تال میں آنے کی کوشش کریں گے۔ پہلے میچ میں وراٹ 50 رنز بنا لیں تو باقی ٹورنامنٹ کے لیے سب کے منہ بند ہو جائیں گے۔
کوہلی پانچ ہفتے کے آرام کے بعد 28 اگست کو پاکستان کے خلاف ایشیا کپ کے پہلے میچ میں واپسی کریں گے، جو ان کا 100 واں ٹی ٹوئنٹی بھی ہوگا۔ وہ ہندوستان کے ویسٹ انڈیز اور زمبابوے کے دورے کے لیے ٹیم میں شامل نہیں تھے۔
کوہلی اپنی خراب فارم کی وجہ سے موضوع بحث بنے ہوئے ہیں اور ٹی ٹوئنٹی ٹیم میں ان کی جگہ پر بھی سوال اٹھ رہے ہیں۔
شاستری نے کہا کہ تمام کھلاڑی برے وقت سے گزرتے ہیں اور بین الاقوامی شیڈول سے آرام لینے سے کوہلی کو اپنی غلطیوں پر غور کرنے کا وقت ملاہوگا۔
شاستری نے کہا، ”یہ راکٹ سائنس نہیں ہے۔ بڑے کھلاڑیوں کو جاگنے میں وقت لگتا ہے۔ انہیں وقفے کی ضرورت ہوتی ہے۔ ذہنی تھکاوٹ دنیا کے بہترین کھلاڑی کو بھی ہو سکتی ہے۔ عالمی کرکٹ میں کوئی کھلاڑی ایسا نہیں ہے جو برے دور سے نہ گزرا ہو۔ میرا ماننا ہے کہ (وراٹ کا) یہ وقفہ صرف جسم کے لیے نہیں بلکہ سوچنے کے لیے بھی ہے۔ انہوں اس پر غور کیا ہوگا کہ وہ کیا بہتر کر سکتے تھے۔
اس دوران ہندوستان کرکٹ ٹیم کے سابق ہیڈ کوچ روی شاستری نے ان کے جانشین راہل دراوڑ کے کورونا وائرس سے متاثر ہونے کے بعد آج کہا کہ فکرکرنےکی کوئی بات نہیں ہے اور وہ کورونا کو شکست دے کر ہندوستان-پاکستان میچ مقابلے کے لئے لوٹ آئیں گے۔
انہوں نے کہا کہ مجھے نہیں لگتا کہ اس سے زیادہ فرق پڑے گا۔ آج اسے کووڈ-19 نہ کہیں، وہ صفر فلو ہے۔ دراوڑ تین چار دنوں میں صحت یاب ہونے کے بعد میدان پر لوٹ آئیں گے۔
قابل ذکر ہے کہ ہندوستانی کرکٹ ٹیم کے ہیڈ کوچ راہل دراوڑ ٹیم کے متحدہ عرب امارات روانہ ہونے سے قبل منگل کو کورونا سے متاثر پائے گئے تھے۔ ہندوستان کے کرکٹ کنٹرول بورڈ (بی سی سی آئی) کو امید ہے کہ راہل دراوڑ کورونا سے صحت یاب ہونے کے بعد ہندوستانی ٹیم میں شامل ہوں گے۔ وہ فی الحال بی سی سی آئی کی میڈیکل ٹیم کی نگرانی میں ہیں۔
شاستری نے کورونا کے سلسلے میں یہ بھی کہا کہ اگر ہندوستانی ٹیم انگلینڈ کی ٹیسٹ سیریز کا پانچواں اور آخری میچ 2021 میں ہی کھیلتی تو وہ سیریز جیت سکتی تھی۔ ہندوستان اور انگلینڈ کے درمیان 2021 میں پانچویں ٹیسٹ کے انعقاد کے لیے کوششیں کی گئی تھیں لیکن کورونا وائرس کے متعدد کیسز کی وجہ سے اسے ملتوی کر دیا گیا تھا۔ یہ میچ بالآخر جولائی 2022 میں کھیلا گیا، جس میں انگلینڈ نے جیت کر سیریز 2-2 سے برابر کر دی۔
شاستری نے کہا کہ جب مجھے گزشتہ سال کورونا انفیکشن ہوا تھا تو میں چھ دنوں میں ڈریسنگ روم میں لوٹ سکتا تھا۔ میں اعتماد کے ساتھ کہہ سکتا ہوں کہ اگر میں چھ سات دنوں میں ڈریسنگ روم میں واپس آتا اور وہ میچ ہم اولڈ ٹریفورڈ میں کھیلتے تو ہم وہ میچ جیت جاتے۔ اب کورونا کی بات نہ کریں، یہ صرف فلو ہے۔ دو پیراسیٹامول لیں اور آپ انڈیا بمقابلہ پاکستان میچ کے لیے میدان میں واپس آ جائیں گے۔