پی سی آر اور گوپال پورہ گرینیڈ دھماکوں میں پولیس اہلکار اور شہری زخمی

سرینگر//
وسطی کشمیر کے بڈگام اور سرینگر اضلاع میں آج شام ہوئے دو گرینیڈدھماکوں میں پولیس کے ایک اہلکار سمیت دو ؍افراد زخمی ہو گئے ۔
پولیس ذرائع کے مطابق ضلع بڈگام کے گوپال پورہ چاڈورہ میں مشتبہ عسکریت پسندوں کی طرف سے گرینیڈ پھینکنے کے بعد ایک شہری زخمی ہو گیا۔
زخمی شہری کی شناخت ۲۰ سالہ کرن کمار ولد انل کمار کے طور ہوئی ہے۔ کمار کو متعدد چوٹوں کے ساتھ فوری طور پر علاج کیلئے سرینگر کے ایس ایم ایچ ایس اسپتال منتقل کیا گیا۔ذرائع کہا کہ کمار کی حالت مستحکم ہے۔
ایک پولیس افسر نے بتایا کہ حملہ آور کی گرفتاری کے لیے تلاش شروع کر دی گئی ہے۔
اس دوران سرینگر میں پولیس کنٹرول روم کے باہر پیر کی شام ایک گرینیڈ دھماکے میں ایک پولیس اہلکار زخمی ہو گیا۔
پولیس نے ایک ٹویٹ میں کہا کہ عسکریت پسندوں نے پولیس کنٹرول روم کشمیر پر گرینیڈ پھینکا، جس کے نتیجے میں ایک پولیس اہلکار ’معمولی‘ زخمی ہوا۔ علاقے کو گھیرے میں لے لیا گیا۔
پولیس نے ایک ٹویٹ میں کہا’’رات کے قریب ساڈھے نوبجے آئی آر پی کی چھٹی بٹالین پر گرینیڈ پھینکا گیا جس میں ایک پولیس اہلکار‘ جس کی شناخت کانسٹیبل شبیر احمد کے نام سے ہوئی ہے‘ کے بائیں بازو میں چوٹیں آئیں۔
زخمی کو علاج کے لیے پولیس اسپتال سری نگر منتقل کیا گیا ہے اور اس کی حالت مستحکم ہے۔
اس سے پہلے سرینگر کے نوہٹہ علاقے میں گذشتہ شام چانس انکاؤنٹر کے دوران زخمی ہونے والا پولیس اہلکار پیر کے روز یہاں ایک فوجی ہسپتال میں زخموں کی تاب نہ لا کر دم توڑ گیا۔
سرکاری ذرائع نے بتایا کہ نوہٹہ سری نگر میں چانس انکاؤنٹر کے دوران زخمی ہونے والا پولیس کانسٹیبل سر فراز احمد سکان بٹوٹ رام بن یہاں فوج کے۹۲بیس ہسپتال میں زیر علاج تھا۔
ذرائع نے کہا کہ ڈاکٹروں کی انتھک کاوشوں کے باوجود وہ پیر کو زخموں کی تاب نہ لاکر دم توڑ گیا۔
دریں اثنا کشمیر زون پولیس نے اپنے ٹویٹر ہیںڈل پر ایک ٹویٹ میں کہا’’گذشتہ روز کے دہشت گردی مخالف آپریشن کے دوران زخمی ہونے والا پولیس کانسٹیبل سرفراز احمد ساکن بٹوٹ رام بن زخموں کی تاب نہ لا کر جام شہادت نوش کر گیا‘‘۔
ٹویٹ میں کہا گیا’’ہم ڈیوٹی کے دوران عظیم قربانی دینے والے اس شہید کو شاندار خراج پیش کرتے ہیں‘‘۔
قابل ذکر ہے کہ سری نگر کے نوہٹہ علاقے میں گذشتہ شام چانس انکاؤنٹر کے دوران ایک پولیس اہلکار اور ایک جنگجو زخمی ہوا تھا۔
پولیس نے اس انکاؤنٹر کے دوران لشکر طیبہ کے دو جنگجوؤں کی طرف سے استعمال کئے جانے والے اسکوٹر ، ایک اے کے رائفل اور دو گرینیڈ بر آمد کرنے کا دعویٰ کیا ہے ۔