جموں؍ ۷ نومبر
لیفٹیننٹ گورنر منوج سنہا اور وزیر اعلیٰ عمر عبداللہ نے دیوالی کے موقع پر جموں و کشمیر کے عوام اور ملک و بیرون ملک یہ تہوار منانے والوں کو مبارکباد پیش کرتے ہوئے نیک خواہشات کا اظہار کیا ہے۔
لیفٹیننٹ گورنر منوج سنہا نے اپنے تہنیتی پیغام میں کہا کہ دیوالی روشنی کی تاریکی پر، نیکی کی بدی پر اور انصاف کی ناانصافی پر دائمی فتح کی علامت ہے۔ انہوں نے کہا کہ اس خوشی کے موقع پر ہر شہری کی زندگی میں خوشی اور خوشحالی لانے کے عزم کی تجدید کی جانی چاہیے اور معاشرے میں ہمدردی، یکجہتی اور باہمی تعاون کے جذبے کو فروغ دینا چاہیے۔
سنہا نے لوگوں پر زور دیا کہ وہ ضرورت مند افراد کی مدد کے لیے آگے آئیں۔ انہوں نے دعا کی کہ ماں لکشمی، بھگوان گنیش اور بھگوان شری رام ہر گھر پر اپنی برکتیں نازل کریں اور یہ تہوار سب کی زندگیوں میں امید، خوشی اور خوشحالی کی روشنی بکھیرے۔
دریں اثنا، وزیر اعلیٰ عمر عبداللہ نے بھی دیوالی کے موقع پر عوام کو مبارکباد پیش کرتے ہوئے کہا کہ روشنی کا یہ تہوار برائی پر اچھائی اور سچائی و راست بازی کی فتح کی علامت ہے۔
اپنے پیغام میں وزیر اعلیٰ نے کہا کہ دیوالی امید، ہم آہنگی اور ہمدردی کا دائمی پیغام دیتی ہے اور اتحاد و باہمی احترام کی ان اقدار کو مضبوط بناتی ہے جو ہندوستان کے متنوع ثقافتی ورثے کی پہچان ہیں۔
عمر عبداللہ نے امید ظاہر کی کہ یہ تہوار ہر گھر میں خوشی، امن اور خوشحالی لے کر آئے گا۔ انہوں نے کہا کہ دیوالی کی روشنی جموں و کشمیر سمیت پورے ملک کے ہر گھر کو منور کرے اور یہاں امن، خوشحالی اور ترقی کے ایک نئے دور کا آغاز ہو۔
دریں اثنا، شمالی کمان کے جنرل آفیسر کمانڈنگ (جی او سی) لیفٹیننٹ جنرل پرتیک شرما نے دیوالی کے موقع پر سیاچن گلیشیئر کی برفانی چوٹیوں پر تعینات فوجی جوانوں سے ملاقات کی اور انہیں تہوار کی مبارکباد پیش کی۔
فوج کی شمالی کمان کے مطابق آرمی کمانڈر نے دنیا کے بلند ترین محاذ جنگ پر تعینات جوانوں کے ساتھ بات چیت کی اور سخت موسمی و جغرافیائی حالات میں ان کے حوصلے اور عزم کو سراہا۔
شمالی کمان نے سوشل میڈیا پلیٹ فارم ایکس پر جاری بیان میں کہا کہ انتہائی دشوار گزار حالات کے باوجود بھارتی فوج کے جوانوں کا عزم اور حوصلہ قابل ستائش ہے۔ لیفٹیننٹ جنرل پرتیک شرما نے جوانوں کو یقین دلایا کہ فوجی قیادت ہر حال میں اپنے اہلکاروں کے ساتھ کھڑی ہے۔
۔۔۔۔۔۔
(ویب ڈیسک)
