منو بھاکر اور کبڈی اسٹار پون سہراوت نے افتتاحی تقریب میں ہندوستانی دستے کی قیادت کی

ناگویا، 19 ستمبر (یواین آئی) جاپان میں ایشین گیمز 2026 کی باضابطہ شروعات کے ساتھ ہی دو مرتبہ کی اولمپک تمغہ فاتح منو بھاکر اور کبڈی اسٹار پون سہراوت نے ہفتہ کو ناگویا سٹی میزوہو پارک ایتھلیٹک اسٹیڈیم میں افتتاحی تقریب کے دوران ہندوستانی دستے کی قیادت کی۔ افتتاحی تقریب میں پورے ایشیا سے آئے کھلاڑیوں نے شرکت کی اور ایشین گیمز کے 20ویں ایڈیشن کا باضابطہ آغاز ہوا۔
پون سہراوت کو آخری وقت میں دو مرتبہ کے ایشین گیمز شاٹ پٹ چیمپئن تاجندرپال سنگھ تور کی جگہ پرچم بردار مقرر کیا گیا۔ تاجندرپال سنگھ تور کو ابتدا میں منو بھاکر کے ساتھ ہندوستان کا پرچم بردار نامزد کیا گیا تھا، لیکن سرکاری کِٹ بروقت نہ ملنے کے باعث وہ ناگویا نہیں پہنچ سکے۔ اس کے بعد ایشین گیمز میں طلائی تمغہ جیتنے والی ہندوستانی مردوں کی کبڈی ٹیم کے رکن پون سہراوت کو یہ ذمہ داری سونپی گئی۔
منو بھاکر پیرس 2024 اولمپکس میں ہندوستان کی نمایاں کھلاڑیوں میں شامل تھیں، جہاں انہوں نے خواتین کے 10 میٹر ایئر پسٹل اور 10 میٹر ایئر پسٹل مکسڈ ٹیم مقابلے میں کانسے کے تمغے جیتے تھے۔
ہندوستانی دستہ زیادہ تر نیوی بلیو رنگ کے ملبوسات میں تھا۔ خواتین نے پیٹرن والے سلور گرے بارڈر کی ساڑیاں پہن رکھی تھیں، جبکہ مردوں نے نیوی بلیو جیکٹ اور ٹراؤزر پہن رکھے تھے۔
ہندوستانی کھلاڑی جب اسٹیڈیم میں داخل ہوئے تو وہ ایک رضاکار کے پیچھے چل رہے تھے، جس کے ہاتھ میں قومی پرچم اور دل کی شکل کا ایک پلے کارڈ تھا، جس پر ہندوستان کا نام درج تھا۔ افتتاحی تقریب کا مرکزی تصور ’’ہارمونک ہارٹ بیٹ‘‘ تھا۔ اسٹیج کو دل کی شکل میں تیار کیا گیا تھا، جو پورے ایشیا سے آئے کھلاڑیوں کے اتحاد کی علامت تھا۔
جاپانی فلم ساز اور ناگویا کے رہنے والے یوکی ہیکو سُتسومی افتتاحی تقریب کے چیف کری ایٹو ڈائریکٹر تھے۔ تقریب میں اولمپک کونسل آف ایشیا سے وابستہ 45 قومی اولمپک کمیٹیوں کے کھلاڑیوں نے شرکت کی۔ ان کھیلوں میں 43 مقابلوں میں 11 ہزار سے زائد کھلاڑیوں کی شرکت متوقع ہے۔
پریڈ کے دوران میزبان جاپان کے دستے کا سب سے زیادہ جوش و خروش سے استقبال کیا گیا۔ جاپانی کھلاڑیوں کے اسٹیڈیم میں داخل ہوتے ہی شائقین نے زوردار تالیاں اور نعرے لگا کر ان کا استقبال کیا۔ مرکزی تقریب سے پہلے ایک وارم اپ پروگرام بھی منعقد ہوا، جس میں جاپانی بوائے بینڈ آئی این آئی اور شیگو ڈسٹرکٹ بو نو تے پریزرویشن سوسائٹی نے شرکت کی۔
اسی شام ایشین گیمز ٹارچ ریلے بھی اختتام پذیر ہوئی۔ یہ ریلے 22 اگست کو ناگویا قلعے سے شروع ہوئی تھی اور تقریباً ایک ہزار مشعل برداروں کے ساتھ آئیچی پریفیکچر کی تمام 40 میونسپلٹیوں اور ناگویا کے 16 وارڈوں سے گزری۔
ناگویا میں تمام شعلوں کو ایک ساتھ لانے سے قبل یہ ریلے ٹوکیو اور ہیروشیما میں منعقدہ شعلہ روشن کرنے کی تقریبات سے بھی گزری۔ دونوں شہر اس سے قبل ایشین گیمز کی میزبانی کر چکے ہیں۔
جاپان تیسری مرتبہ ایشین گیمز کی میزبانی کر رہا ہے۔ اس سے قبل 1994 میں ہیروشیما میں ایشین گیمز منعقد ہوئے تھے، جبکہ ٹوکیو نے 1958 میں ملک میں پہلی مرتبہ ان کھیلوں کی میزبانی کی تھی۔
ایشین گیمز 19 ستمبر سے 4 اکتوبر تک جاری رہیں گے، جن میں 45 ممالک اور او سی اے ریفیوجی ٹیم کے تقریباً 11 ہزار کھلاڑی 43 کھیلوں میں 469 طلائی تمغوں کے لیے مقابلہ کریں گے۔ ہندوستان 2023 کے ہانگ ژو ایشین گیمز میں اپنی تاریخی کارکردگی کو مزید بہتر بنانے کی کوشش کرے گا، جہاں اس نے 28 طلائی تمغوں سمیت ریکارڈ 107 تمغے جیتے تھے۔