مودی کل کریں گےسیمی کون انڈیا کا افتتاح ، 600 سے زیادہ کمپنیاں ہوں گی شامل

نئی دہلی، 16 ستمبر (یو این آئی) وزیراعظم نریندر مودی جمعرات کو یہاں یشوبھومی میں سیمی کون انڈیا 2026 کا افتتاح کریں گے اور ایک اجتماع سے خطاب بھی کریں گے۔
تین روزہ یہ کانفرنس 17 سے 19 ستمبر تک سلیکون سے سسٹم: ایکو سسٹم کی تعمیر موضوع پر منعقد ہوگی۔ اس میں سیمی کنڈکٹر اور الیکٹرانکس کے شعبے سے وابستہ 600 سے زیادہ کمپنیاں شامل ہوں گی۔
کانفرنس میں ہندوستان اور دنیا کی کمپنیاں، پالیسی ساز، سرمایہ کار، محققین، اسٹارٹ اپس، تعلیمی ادارے اور طلباء حصہ لیں گے۔ اس کا فوکس ہندوستان میں تعاون، سرمایہ کاری، جدت اور صلاحیتوں کی ترقی کو آگے بڑھانے پر ہوگا۔ کانفرنس میں ڈسپلے انڈسٹری میں پیش رفت، تعاون اور مشترکہ اقدامات کے لیے چھ ملکوں کی سطح کے اجلاس اور خواتین کی قیادت سے جڑا ایک پلیٹ فارم بھی ہوگا۔
سیمی کون انڈیا 2026 میں سیمی کنڈکٹر مواد، سامان اور چپ ڈیزائن سے لے کر تیاری، ایڈوانسڈ پیکیجنگ، الیکٹرانکس اور سسٹم تک پوری ویلیو چین دکھائی جائے گی۔ ‘سینڈ ٹو سلیکون ٹو سسٹمز’ ویلیو چین ایکسپیرینس کے ذریعے سیمی کنڈکٹر ایکو سسٹم کا پورا سفر پیش کیا جائے گا۔
منتظمین کے مطابق، کانفرنس میں تقریباً 50 ہزار لوگوں کے پہنچنے کی امید ہے۔ اس میں 52 ممالک کے مندوبین، 400 سے زائد حکام اور 150 سے زیادہ مقررین شامل ہوں گے۔ نمائش میں جاپان، جنوبی کوریا، ملائیشیا، نیدرلینڈز، سنگاپور اور سویڈن کے چھ کنٹری پویلین ہوں گے۔ اس کے علاوہ 12 ریاستی بوتھ، اسٹارٹ اپ پویلین، انوویشن شوکیس، اسٹوڈنٹ ہیکاتھن اور ورک فورس ڈیولپمنٹ پویلین بھی ہوں گے۔