سرینگر؍۱۲ ستمبر
ڈویژنل کمشنر کشمیر انشول گرگ نے آج سری نگر رنگ روڈ فیز ٹو اور فیز ٹو اے کی تکمیل میں حائل رکاوٹیں دور کرنے کے لیے کیے جانے والے اقدامات کا جائزہ لینے کے لیے ایک اجلاس کی صدارت کی۔
اس موقع پر این ایچ اے آئی کے افسران نے منصوبے کے حوالے سے تفصیلی پریزنٹیشن پیش کی، جس میں عملدرآمد میں درپیش رکاوٹوں سے آگاہ کیا گیا۔ ان میں اراضی کے حصول کی صورتحال، معاوضے کی ادائیگی، سرکاری و نجی ڈھانچوں کی مسماری، مختلف تنصیبات کی منتقلی یا تبدیلی، یوٹیلیٹی شفٹنگ، عدالتی مقدمات اور درختوں کی کٹائی شامل ہیں۔
ڈویژنل کمشنر نے ڈپٹی کمشنر گاندربل کو ہدایت دی کہ ایڈیشنل ڈپٹی کمشنر گاندربل، تحصیلدار، این ایچ اے آئی اور ٹھیکیدار پر مشتمل مشترکہ ٹیم تشکیل دے کر حاصل شدہ اراضی کا قبضہ منگل تک تعمیراتی ایجنسی کے حوالے کیا جائے۔
انہوں نے این ایچ اے آئی کو ان گرین فیلڈ اراضی کے حصوں کا بھی فوری قبضہ لینے کی ہدایت دی جہاں ایجنسی کو کسی رکاوٹ کا سامنا نہیں ہے۔
صوبائی کمشنر نے نجی ڈھانچوں کی دستاویز بندی اور ہفتہ تک تمام ایسے ڈھانچوں کی مسماری کی ہدایت بھی دی تاکہ منصوبے کی راہ میں حائل رکاوٹیں اور بلیک اسپاٹس ختم کیے جا سکیں۔
گرگ نے سڑک کی الائنمنٹ میں آنے والے چنار اور اخروٹ کے درختوں کی مقررہ ضابطے کے تحت مرحلہ وار کٹائی کی ہدایت دی۔انہوں نے این ایچ اے آئی کے افسران پر زور دیا کہ منصوبے کی گاڑیوں کی آمدورفت کے باعث گاندربل میں موجودہ سڑکوں کو پہنچنے والے نقصان کی فوری مرمت بھی کی جائے۔
اجلاس میں ڈپٹی کمشنر گاندربل، ایس ایس پی ٹریفک رورل، پروجیکٹ ڈائریکٹر این ایچ اے آئی اور محکمہ آر اینڈ بی، پی ایچ ای اور کے پی ڈی سی ایل کے افسران نے شرکت کی۔
۔۔۔۔۔۔۔۔۔(ڈی آئی پی آر)
