ڈوڈہ؍۱۰ستمبر
ڈائریکٹر جنرل آف پولیس(ڈی جی پی)‘ نلن پربھات نے جمعرات کے روز ڈوڈہ، کٹھوعہ اور اودھم پور کے سنگم والے علاقے میں قائم مشترکہ عارضی آپریشنل بیس(ٹی او بی) کا دورہ کیا، جہاں اسپیشل آپریشنز گروپ(ایس او جی )‘راشٹریہ رائفلز(آر آر ) اور سینٹرل ریزرو پولیس فورس(سی آر پی ایف) کے اہلکار مشترکہ طور پر تعینات ہیں۔
ڈی جی پی کے ہمراہ انسپکٹر جنرل آف پولیس، جموں زون، ڈپٹی انسپکٹر جنرل ڈی کے آر رینج، ڈپٹی انسپکٹر جنرل اودھم پور-رام بن رینج اور سینئر سپرنٹنڈنٹ آف پولیس ڈوڈہ بھی موجود تھے۔
دورے کے دوران اعلیٰ افسران نے اس تزویراتی اعتبار سے اہم علاقے میں سکیورٹی انتظامات، آپریشنل تیاری اور مشترکہ افواج کی جانب سے کیے جارہے انسدادِ دہشت گردی اقدامات کا جائزہ لیا۔
افسران نے خطے میں موجودہ سکیورٹی صورتحال کا بھی جائزہ لیا اور بین ایجنسی تال میل، علاقے میں تسلط برقرار رکھنے اور نگرانی کے نظام کو مزید مضبوط بنانے کے اقدامات پر تبادلہ خیال کیا۔
ڈی جی پی نے مشترکہ ٹی او بی پر تعینات اہلکاروں سے ملاقات کی اور ان کی فرض شناسی، چوکسی اور آپریشنل عزم کو سراہا۔ انہوں نے ابھرتے ہوئے سکیورٹی چیلنجز سے مؤثر طور پر نمٹنے کے لیے تمام سکیورٹی فورسز کے درمیان مسلسل چوکس رہنے اور قریبی تال میل کی ضرورت پر زور دیا۔
یہ دورہ جموں و کشمیر پولیس اور دیگر سکیورٹی ایجنسیوں کی جانب سے مؤثر سکیورٹی گرڈ برقرار رکھنے اور حساس و تزویراتی اہمیت کے حامل علاقوں میں سکیورٹی انتظامات مزید مضبوط بنانے کی جاری کوششوں کا حصہ ہے۔
۔۔۔۔۔۔ایجنسیاں
