اقوام متحدہ؍۵ ستمبر
وزیر خارجہ ایس جے شنکر۲۶ ستمبر کو اقوام متحدہ کی جنرل اسمبلی کے سالانہ اعلیٰ سطحی اجلاس سے خطاب کریں گے۔
اقوام متحدہ کی جنرل اسمبلی کا۸۱ اں اجلاس۸ستمبر سے شروع ہوگا، جبکہ۱۹۳ رکنی عالمی ادارے کے جنرل مباحثے کا سلسلہ۲۲ سے۲۸ ستمبر تک جاری رہے گا، جس میں دنیا بھر کے رہنما خطاب کریں گے۔
اعلیٰ سطحی اجلاس کے مقررین کی نظرثانی شدہ عارضی فہرست کے مطابق جے شنکر۲۶ ستمبر کی سہ پہر جنرل مباحثے سے خطاب کریں گے۔
وہ گزشتہ سال بھی اقوام متحدہ کے پلیٹ فارم سے عالمی رہنماؤں سے خطاب کر چکے ہیں۔
جنرل مباحثے کا آغاز۲۲ ستمبر کو روایتی طور پر برازیل کے خطاب سے ہوگا، جس کے بعد امریکا کا نمبر ہوگا۔ اقوام متحدہ کی جنرل اسمبلی کے۸۱ ویں اجلاس کی ایک سالہ مدت کی صدارت بنگلہ دیش کے وزیر خارجہ خلیل الرحمن کریں گے، جنہیں جون میں۱۹۳ رکنی عالمی ادارے کی سربراہی کے لیے منتخب کیا گیا تھا۔
امریکی صدر ڈونلڈ ٹرمپ بھی۲۲ ستمبر کو جنرل اسمبلی کے اجلاس کے موقع پر اقوام متحدہ کی مشہور نشست سے عالمی رہنماؤں سے خطاب کریں گے۔ وائٹ ہاؤس میں اپنی دوسری مدت کے دوران اقوام متحدہ کی جنرل اسمبلی سے یہ ان کا دوسرا خطاب ہوگا۔
اقوام متحدہ کے صدر دفتر میں ستمبر میں ہونے والا اعلیٰ سطحی اجلاس سال کا’سب سے مصروف سفارتی موسم‘ تصور کیا جاتا ہے۔
اس سال کا اجلاس ایسے وقت میں ہو رہا ہے جب دنیا کے مختلف حصوں میں جغرافیائی و سیاسی تنازعات جاری ہیں۔ ان میں امریکا اور اسرائیل کی ایران کے خلاف کئی ماہ سے جاری جنگ بھی شامل ہے، جس کے تباہ کن اثرات عالمی جنوب اور کم ترقی یافتہ ممالک پر بھی پڑے ہیں۔ آبنائے ہرمز میں مسلسل خلل کے باعث خوراک اور ایندھن کی قیمتوں میں اضافے نے ان ممالک کی مشکلات مزید بڑھا دی ہیں۔
جنرل اسمبلی کے اجلاس کے دوران کئی اہم اعلیٰ سطحی ملاقاتیں اور اجلاس بھی ہوں گے۔ ان میں ترقی کے حق سے متعلق اعلامیے کی۴۰ ویں سالگرہ کے حوالے سے خصوصی اجلاس اور موسمیاتی اقدامات اور منصفانہ منتقلی سے متعلق اجلاس شامل ہیں۔
اس کے علاوہ سمندر کی سطح میں اضافے سے پیدا ہونے والے وجودی خطرات، وبائی امراض کی روک تھام، ان کے لیے تیاری اور مؤثر ردعمل کے موضوعات پر بھی اعلیٰ سطحی اجلاس ہوں گے۔ جوہری ہتھیاروں کے مکمل خاتمے کے عالمی دن کی مناسبت سے خصوصی اجلاس بھی منعقد کیا جائے گا۔
بنگلہ دیش اور نیپال کے سربراہانِ حکومت۲۴ ستمبر کو جنرل مباحثے سے خطاب کریں گے، جبکہ پاکستان ایک روز بعد‘۲۵ ستمبر کو اپنا خطاب کرے گا۔
یہ اقوام متحدہ کے موجودہ سیکریٹری جنرل انتونیو گوتریس کے لیے جنرل اسمبلی کا آخری اعلیٰ سطحی اجلاس بھی ہوگا۔ عالمی ادارے کے سربراہ کی حیثیت سے ان کی دوسری پانچ سالہ مدت رواں سال دسمبر میں ختم ہو رہی ہے۔
اقوام متحدہ کے نئے سیکریٹری جنرل کے انتخاب کا عمل جاری ہے اور سب کی نظریں اس بات پر مرکوز ہیں کہ آیا اس۸۰ سالہ عالمی ادارے کی تاریخ میں پہلی مرتبہ کسی خاتون کو سیکریٹری جنرل منتخب کیا جائے گا۔ (ایجنسیاں)
ایجنسیاں
