اے ایف سی انڈر-20 ایشین کپ کوالیفائر میں ہندوستان ازبکستان سے 0-4 سے ہارا، امیدیں برقرار

تاشقند (ازبکستان)، 4 ستمبر (یو این آئی) ہندوستان کی انڈر-20 مردوں کی فٹبال ٹیم کو اے ایف سی انڈر-20 ایشین کپ چین 2027 کوالیفائر کے دوسرے میچ میں میزبان ازبکستان کے ہاتھوں 0-4 سے شکست کا سامنا کرنا پڑا۔ اس کے باوجود ہندوستان کی کوالیفائی کرنے کی امیدیں برقرار ہیں۔
ڈسٹلک اسٹیڈیم میں جمعرات کی رات کھیلے گئے میچ میں ازبکستان کی جانب سے الغبیک مراتوف نے 29ویں منٹ میں پہلا گول کیا، جبکہ کوونچبیک ابرائیف نے فری کک پر دوسرا گول کرکے برتری دگنی کردی۔ شوراخیم شوراخمیڈوف نے 67ویں منٹ میں تیسرا اور متبادل کھلاڑی نوربیک سرسن بائیف نے 90ویں منٹ میں چوتھا گول کیا۔
ہندوستان گروپ بی میں سیریا کے خلاف پہلے میچ میں 1-0 کی جیت کی بدولت ہیڈ ٹو ہیڈ ریکارڈ کی بنیاد پر دوسرے مقام پر برقرار ہے۔ ہندوستان کا آخری گروپ میچ 6 ستمبر کو بنگلہ دیش کے خلاف ہوگا۔ ہندوستان یہ میچ جیتتا ہے اور سیریا، ازبکستان کو شکست دینے میں ناکام رہتا ہے تو ہندوستانی ٹیم دوسرے مقام پر رہے گی اور آٹھ گروپوں کے سات بہترین رنر اپ میں شامل ہوکر ایشین کپ کے لیے کوالیفائی کرنے کا مضبوط موقع حاصل کر سکتی ہے۔
میچ میں ازبکستان نے شروع سے ہی دباؤ بنائے رکھا۔ پہلے ہاف میں مراتوف اور ابرائیف کے گول نے میزبان ٹیم کو 2-0 کی برتری دلائی۔ دوسرے ہاف میں بھی ازبکستان کا دباؤ جاری رہا اور شوراخمیڈوف و سرسن بائیف کے گول سے اس نے 4-0 سے کامیابی حاصل کرلی۔