ڈبلیو ٹی اے 250 چنئی اوپن 2 سے 8 نومبر تک

چنئی، 14 اگست (یواین آئی) ڈبلیو ٹی اے 250 چنئی اوپن بین الاقوامی ٹینس ٹورنامنٹ 2 سے 8 نومبر تک چنئی کے ایس ڈی اے ٹی ننگمباکم ٹینس اسٹیڈیم میں کھیلا جائے گا۔
تمل ناڈو ٹینس ایسوسی ایشن کے صدر اور سابق ڈیوس کپ کھلاڑی وجے امرت راج نے جمعہ کو پریس کانفرنس میں بتایا کہ چنئی اوپن مسلسل دوسرے سال اور مجموعی طور پر تیسری بار منعقد ہورہا ہے۔ ٹورنامنٹ میں دنیا کی ٹاپ 100 کھلاڑیوں میں شامل ٹینس اسٹارز شرکت کریں گی۔
انہوں نے کہا کہ بین الاقوامی ٹورنامنٹس سے ریاست میں ٹینس کو فروغ دینے میں مدد ملتی ہے۔ گزشتہ سال ہندوستانی کھلاڑی سہجا یملپلی اور شری ولی بھامدی پتی پہلی بار ڈبلیو ٹی اے 250 ایونٹ کے دوسرے دور تک پہنچی تھیں۔
انہوں نے بتایا کہ اس سال پہلی بار تینوں میچ کورٹس پر الیکٹرانک لائن کالنگ ٹیکنالوجی استعمال کی جائے گی۔ انہوں نے ٹورنامنٹ کے لیے 10 کروڑ روپے مختص کرنے پر تمل ناڈو کے وزیراعلیٰ اور اسپورٹس ڈیولپمنٹ اتھارٹی آف تمل ناڈو (ایس ڈی اے ٹی) کا شکریہ ادا کیا۔
کھیل اور نوجوانوں کے امور کے سکریٹری سندیپ نندوری نے کہا کہ تمل ناڈو کے لیے ڈبلیو ٹی اے 250 ٹورنامنٹ کی میزبانی کرنا باعث فخر ہے۔ انہوں نے ریاست میں کھیلوں کو فروغ دینے اور 2036 تک اولمپک مقابلوں میں زیادہ تمغے حاصل کرنے کے ہدف کی جانب مسلسل کوششوں پر زور دیا۔