یمن کی المخا بندرگاہ پر حوثیوں کے حملے میں 7 افراد ہلاک، 35 زخمی

صنعاء، 9 اگست (یو این آئی) یمنی حکومت کی فوج کے مطابق، حوثیوں کی جانب سے آج صبح المخا بندرگاہ پر کیے گئے فضائی حملے میں کم از کم سات افراد ہلاک اور تقریباً 35 زخمی ہو گئے۔
طبی ذرائع کے حوالے سے مقامی میڈیا نے بتایا کہ میزائل اور ڈرون حملوں کے نتیجے میں بندرگاہ کے قریبی رہائشی علاقوں کو بھی شدید نقصان پہنچا، جس سے بڑی تعداد میں شہری زخمی ہوئے جنہیں علاج کے لیے قریب کے ہسپتالوں میں منتقل کر دیا گیا ہے۔
دوسری جانب، یمن کے حوثی گروپ نے اس کارروائی کی باضابطہ ذمہ داری قبول کی ہے۔ حوثی ملٹری کے ترجمان یحییٰ سریع کے مطابق کارروائی میں ’’بڑی تعداد میں بیلسٹک میزائلوں اور ڈرونز‘‘ کا استعمال کیا گیا۔ ترجمان کے مطابق، حملے کا ہدف ’’سعودی دشمن کے اہلکار اور اسلحہ کے گودام‘‘ تھے۔
واضح رہے کہ المخا بندرگاہ اسٹریٹجک لحاظ سے انتہائی اہم ہے اور یمنی حکومت کے کنٹرول میں ہے۔ تازہ ترین حملے سے خطے میں جاری کشیدگی اور تحفظاتی خدشات میں مزید اضافہ ہو گیا ہے۔