ویسٹرن آسٹریلیا اور پرتھ اسکارچرز کے تیز گیندباز میتھیو کیلی نے کرکٹ سے ریٹائرمنٹ کا اعلان کر دیا

سڈنی، 7 اگست (یو این آئی) ویسٹرن آسٹریلیا اور پرتھ اسکارچرز کے تیز گیندباز میتھیو کیلی نے مسلسل انجریوں سے متاثر رہنے کے بعد 31 برس کی عمر میں پیشہ ورانہ کرکٹ سے ریٹائرمنٹ کا اعلان کر دیا۔ سرخ گیند اور سفید گیند، دونوں طرز کی کرکٹ میں ان کا ریکارڈ متاثر کن رہا۔ انہوں نے 59 فرسٹ کلاس میچوں میں 27.43، لسٹ اے کرکٹ میں 32.76 اور 42 ٹی-20 میچوں میں 20.85 کی اوسط سے گیندبازی کی۔ ان میں سے بیشتر مقابلے انہوں نے پرتھ اسکارچرز کی نمائندگی کرتے ہوئے کھیلے۔
اپنی ریٹائرمنٹ پر میتھیو کیلی نے کہا، ’’جب میں پہلی بار ڈبلیو اے سی اے گراؤنڈ کے دروازے سے اندر داخل ہوا تھا تو کبھی نہیں سوچا تھا کہ کرکٹ مجھے کہاں سے کہاں لے جائے گی۔ یہ جگہ جلد ہی میری پسندیدہ بن گئی اور وہاں گزارا گیا وقت میرے لیے گھر سے دور ایک اور گھر کی مانند تھا۔ میں اپنے تمام ساتھی کھلاڑیوں کا تہہ دل سے شکریہ ادا کرنا چاہتا ہوں جن کے ساتھ میدان اور ڈریسنگ روم شیئر کرنے کا موقع ملا۔ اس شاندار سفر، خوشیوں، چیلنجز، کامیابیوں، تعاون اور سب سے بڑھ کر ان دوستیوں کے لیے میں سب کا ممنون ہوں جو کرکٹ کے میدان سے آگے بھی قائم رہیں گی۔ ہم نے جو یادگار لمحات ایک ساتھ گزارے، انہیں میں ہمیشہ اپنے ساتھ رکھوں گا۔‘‘
ویسٹرن آسٹریلیا کرکٹ کے جنرل منیجر کیڈ ہاروی نے کہا، ’’میتھیو کیلی نے ویسٹرن آسٹریلیا اور پرتھ اسکارچرز، دونوں کے لیے کئی یادگار کارکردگیاں پیش کیں اور تمام فارمیٹس میں ٹیم کی حالیہ کامیابیوں میں اہم کردار ادا کیا۔ سب سے اہم بات یہ ہے کہ میٹ میں وہ تمام خوبیاں موجود ہیں جن کی ہم اپنے کھلاڑیوں سے توقع رکھتے ہیں، اسی لیے تمام کوچز، عملہ اور ساتھی کھلاڑی ان کا بے حد احترام کرتے ہیں۔ گزشتہ دس سیزن کے دوران انہوں نے میدان کے اندر اور باہر غیر معمولی خدمات انجام دیں۔ ہم ان کے مستقبل کے لیے نیک تمناؤں کا اظہار کرتے ہیں اور ڈبلیو اے سی اے گراؤنڈ میں ان کا ہمیشہ خیرمقدم کیا جائے گا۔‘‘