ہندوستانی فوج کی آئس ہاکی ٹیم پہلی رائل اینفیلڈ چیلنجرز کپ کی چیمپئن بن گئی

لیہہ، 7 اگست (یو این آئی) لیہہ میں منعقدہ پہلے رائل اینفیلڈ چیلنجرز کپ کا اختتام ایک سنسنی خیز فائنل کے ساتھ ہوا، جس میں ہندوستانی فوج کی آئس ہاکی ٹیم نے لیہہ کنگز کو 5-6 سے شکست دے کر ٹورنامنٹ کا پہلا خطاب اپنے نام کر لیا۔
نوانگ دورجے اسٹوبدان (این ڈی ایس) اسٹیڈیم میں کھیلے گئے اس دلچسپ مقابلے میں رائل اینفیلڈ آئس ہاکی لیگ کے ابھرتے ہوئے کھلاڑیوں پر مشتمل لیہہ کنگز نے ملک کی مضبوط ترین آئس ہاکی ٹیم کو آخری لمحے تک سخت ٹکر دی۔
میچ کے اختتامی لمحات میں پدما نامگیال نے فونتسوگ نامگیال کے پاس پر فیصلہ کن گول داغ کر ہندوستانی فوج کی ٹیم کو تاریخی فتح دلا دی۔
ناظرین سے کھچا کھچ بھرے اسٹیڈیم میں کھیلے گئے اس سنسنی خیز فائنل نے رائل اینفیلڈ سوشل مشن کے تحت تیار کیے گئے کھلاڑیوں کی تربیت اور صلاحیتوں کو فروغ دینے کے ماڈل کی کامیابی کو بھی اجاگر کیا۔