مچل اسٹارک کپل دیو اور ڈیل اسٹین کو پیچھے چھوڑ سکتے ہیں

میلبورن، 6 اگست (یو این آئی) آسٹریلیا کے تجربہ کار تیز گیندباز مچل اسٹارک بنگلہ دیش کے خلاف آئندہ ٹیسٹ سیریز کے دوران ٹیسٹ کرکٹ میں سب سے زیادہ وکٹیں لینے والوں کی فہرست میں ہندوستان کے کپل دیو اور جنوبی افریقہ کے ڈیل اسٹین کو پیچھے چھوڑ سکتے ہیں، تاہم ان کا کہنا ہے کہ وہ ان ریکارڈز کے بارے میں زیادہ نہیں سوچ رہے۔
36 سالہ اسٹارک نے 2025 میں شاندار کارکردگی کا مظاہرہ کرتے ہوئے 11 ٹیسٹ میچوں میں 55 وکٹیں حاصل کیں، جو اس سال کسی بھی گیندباز کی سب سے زیادہ وکٹیں ہیں۔ ایشز سیریز میں انہوں نے 31 وکٹیں لے کر آسٹریلیا کی 4-1 کی فتح میں اہم کردار ادا کیا۔
اسٹارک اب تک 105 ٹیسٹ میں 433 وکٹیں لے چکے ہیں۔ وہ کپل دیو کے 434 وکٹوں کے ریکارڈ سے صرف ایک اور ڈیل اسٹین کے 439 وکٹوں کے ریکارڈ سے چھ وکٹیں دور ہیں۔ آسٹریلیا کی جانب سے صرف شین وارن، نیتھن لیون اور گلین میک گرا نے ان سے زیادہ ٹیسٹ وکٹیں حاصل کی ہیں۔
اسٹارک نے کہا، "ان عظیم گیندبازوں کے ساتھ میرا نام لیا جانا اعزاز کی بات ہے، لیکن جب تک آپ کھیل رہے ہوں، ایسے اعداد و شمار زیادہ معنی نہیں رکھتے۔ میری توجہ صرف اگلے میچ پر ہے۔”
انہوں نے کہا کہ ان کی حالیہ کامیابی کی بڑی وجہ واضح ذہن اور مسلسل بہتری کی کوشش ہے۔ ان کے مطابق، تجربے کے ساتھ نئی مہارتیں، جیسے ووبل سیم ، اور بہتر تسلسل نے ان کی بولنگ کو مزید مؤثر بنایا ہے۔ چوٹ کے باعث آئی پی ایل کے ابتدائی مرحلے سے باہر رہنے والے اسٹارک اب 13 اگست سے ڈارون میں بنگلہ دیش کے خلاف شروع ہونے والے پہلے ٹیسٹ میں واپسی کریں گے۔