شکیب الحسن کے آبائی گھر پر پیٹرول بم سے حملہ

ڈھاکہ، 6 اگست (یو این آئی) بنگلہ دیش کے سابق کپتان اور سابق رکن پارلیمنٹ شکیب الحسن کے مگورا میں واقع آبائی گھر پر نامعلوم افراد نے پیٹرول بم سے حملہ کرکے توڑ پھوڑ کی۔ یہ واقعہ سابق وزیر اعظم شیخ حسینہ کی ایک ورچوئل پریس کانفرنس میں شکیب الحسن کی شرکت کے چند گھنٹے بعد پیش آیا۔
میڈیا رپورٹس کے مطابق بدھ کی رات تقریباً 8:45 بجے مگورا شہر کے کیشوموڑ علاقے میں واقع شکیب کے گھر پر حملہ کیا گیا۔ حملہ آوروں نے مبینہ طور پر گھر پر پیٹرول بم پھینکا اور بعد ازاں املاک کو نقصان پہنچایا۔ تاہم اس واقعے میں کسی جانی نقصان کی اطلاع نہیں ملی ہے۔
یہ حملہ نئی دہلی کے فارن کورسپونڈنٹس کلب کے زیر اہتمام منعقدہ ورچوئل پریس کانفرنس کے بعد ہوا، جس میں جلاوطنی کے دوران شیخ حسینہ نے میڈیا سے خطاب کیا تھا اور شکیب الحسن بھی آن لائن شریک ہوئے تھے۔
عوامی لیگ نے اس حملے کی مذمت کرتے ہوئے اسے سیاسی وجوہات پر مبنی کارروائی قرار دیا اور اپنے مخالفین پر پارٹی رہنماؤں اور کارکنوں کو نشانہ بنانے کا الزام عائد کیا۔
پریس کانفرنس کے دوران شیخ حسینہ نے کہا کہ خطرات کے باوجود وہ دسمبر میں بنگلہ دیش واپس آنے کے اپنے فیصلے پر قائم ہیں۔ انہوں نے کہا، "ممکن ہے مجھے جیل بھیج دیا جائے یا قتل کر دیا جائے، لیکن میں اپنے عوام کے پاس ضرور واپس آؤں گی۔”
بنگلہ دیشی حکام نے تاحال حملے یا اس کے پسِ پردہ وجوہات کے بارے میں کوئی باضابطہ بیان جاری نہیں کیا ہے۔ واقعے کی تحقیقات شروع کیے جانے کی توقع ہے۔