بجلی گرنے سے تھائی فٹبالر جاں بحق، 12 کھلاڑی زخمی

بینکاک، 6 اگست (یو این آئی) تھائی لینڈ کے جنوبی علاقے میں ایک مقامی فٹبال میچ کے دوران بجلی گرنے سے 24 سالہ فٹبالر سوفوان آوائے جاں بحق جبکہ 12 دیگر کھلاڑی زخمی ہوگئے۔
رپورٹس کے مطابق بارش کے دوران میچ جاری تھا کہ اچانک میدان پر بجلی گری، جس کے ساتھ زور دار دھماکے کی آواز بھی سنائی دی۔ سوشل میڈیا پر وائرل ہونے والی ویڈیو میں دیکھا جا سکتا ہے کہ بجلی گرنے کے فوراً بعد کھلاڑی زخمی سوفوان آوائے کی طرف دوڑتے ہیں، جو زمین پر بے بس پڑے تھے۔
سوفوان آوائے، جو ونگر کے طور پر کھیلتے تھے، کو فوری طور پر طبی امداد فراہم کی گئی، تاہم شدید زخموں کی تاب نہ لاتے ہوئے وہ دم توڑ گئے۔
واقعے میں زخمی ہونے والے 12 دیگر کھلاڑیوں کو بھی علاج کے لیے اسپتال منتقل کیا گیا۔ اس افسوسناک حادثے نے مقامی فٹبال حلقوں میں غم کی لہر دوڑ گئی ہے۔