ایجنسیاں
سرینگر؍۳۱ جولائی
جموں و کشمیر انسدادِ بدعنوانی بیورو (اے سی بی) نے محکمہ فائر اینڈ ایمرجنسی سروسز میں سال۲۰۲۰ کی بھرتی کے عمل میں مبینہ بے ضابطگیوں کی تحقیقات کے سلسلے میں۵۵۲ منتخب امیدواروں کو دوبارہ قد کی پیمائش (ہائٹ میژرمنٹ) کے لیے طلب کیا ہے۔
سرکاری مراسلے کے مطابق سینئر سپرنٹنڈنٹ آف پولیس، پولیس اسٹیشن اے سی بی سینٹرل، جموں نے ڈائریکٹر جنرل فائر اینڈ ایمرجنسی سروسز کو ہدایت دی ہے کہ آرڈر نمبر۸۲۳ آف۲۰۲۰ مؤرخہ۴؍ اکتوبر۲۰۲۰ کے تحت منتخب امیدواروں کو مطلع کیا جائے کہ وہ۳؍اگست کو صبح۱۰ بجے اپنے مقررہ مراکز پر حاضر ہوں۔
یہ کارروائی پولیس اسٹیشن اے سی بی سینٹرل، جموں میں درج ایک ایف آئی آر کے سلسلے میں کی جا رہی ہے۔
۳۰ جولائی کو جاری کیے گئے مراسلے کے مطابق مختلف اضلاع میں تعینات امیدواروں کو سات مراکز میں تقسیم کیا گیا ہے تاکہ ان کے قد کی دوبارہ پیمائش کی جا سکے۔
اس کے مطابق سرینگر، بڈگام اور گاندربل کے۱۳۰؍ امیدوار ڈی پی ایل سرینگر میں رپورٹ کریں گے، جبکہ بارہمولہ، بانڈی پورہ اور کپواڑہ کے۱۲۴؍امیدوار ڈی پی ایل بارہمولہ میں حاضر ہوں گے۔
اسی طرح اننت ناگ، شوپیاں، پلوامہ اور کولگام کے۹۳؍امیدواروں کو ڈی پی ایل اننت ناگ طلب کیا گیا ہے۔
جموں خطے میں جموں، کٹھوعہ اور سانبہ کے۸۲ امیدوار ڈی پی ایل جموں، ڈوڈہ، کشتواڑ اور رام بن کے۵۶ امیدوار ڈی پی ایل ڈوڈہ، راجوری اور پونچھ کے۳۸؍ امیدوار ڈی پی ایل راجوری جبکہ ادھم پور اور ریاسی کے۲۹؍امیدوار ڈی پی ایل ادھم پور میں رپورٹ کریں گے۔
اے سی بی نے جموں و کشمیر کے تمام ضلعی سینئر سپرنٹنڈنٹس آف پولیس کو بھی مراسلہ بھیج کر ہدایت دی ہے کہ وہ اپنے اپنے اضلاع میں تعینات امیدواروں کو متعلقہ پولیس کنٹرول روم (پی سی آر) کے ذریعے مطلع کریں اور مقررہ تاریخ و وقت پر ان کی حاضری یقینی بنائیں۔
محکمہ فائر اینڈ ایمرجنسی سروسز کے اسسٹنٹ ڈائریکٹروں کو بھی ہدایت دی گئی ہے کہ وہ اپنے دائرۂ اختیار میں آنے والے امیدواروں کی مقررہ مراکز پر موجودگی کو یقینی بنائیں۔
واضح رہے کہ اے سی بی کی یہ کارروائی سال۲۰۲۰ کی فائر اینڈ ایمرجنسی سروسز بھرتی کے عمل میں مبینہ بے ضابطگیوں کی تحقیقات کا حصہ ہے۔
اس سے قبل اے سی بی نے بتایا تھا کہ آرڈر نمبر۸۲۳ آف۲۰۲۰ کے تحت مجموعی طور پر۶۹۰؍ امیدواروں کا انتخاب کیا گیا تھا، جن میں۵۹۲ فائر مین اور۹۸ فائر مین ڈرائیور شامل تھے۔ بیورو کے مطابق تحقیقات کا محور بھرتی کے عمل میں مبینہ بے ضابطگیاں ہیں۔
خدمت انجام دے رہے منتخب امیدواروں کی قد کی دوبارہ پیمائش۳؍اگست صبح۱۰ بجے جموں و کشمیر کے ساتوں نامزد مراکز پر کی جائے گی۔
