جموں میں سیلاب، لینڈ سلائیڈنگ اور مٹی کے تودے گرنے کا خدشہ‘: محکمہ موسمیات کی مسافروں کو احتیاط برتنے کی ہدایت
ایجنسیاں
سرینگر؍۳۰ جولائی
محکمہ موسمیات کے ڈائریکٹر‘ مختار احمد نے جمعرات کو کہا کہ آئندہ چند دنوں کے دوران وادی کشمیر میں شدید بارش کا کوئی بڑا سلسلہ متوقع نہیں، تاہم وقفے وقفے سے ہلکی بارش اور مختصر بارشیں جاری رہیں گی، جبکہ جموں صوبے میں موسلا دھار بارش کا امکان ہے، جس کے باعث اچانک سیلاب، لینڈ سلائیڈنگ اور مٹی کے تودے گرنے کا خطرہ بھی موجود رہے گا۔
احمد نے کہا کہ وادی کشمیر میں مجموعی طور پر موسم نسبتاً مستحکم رہے گا، جبکہ بارش کی سرگرمیاں جموں صوبے میں زیادہ نمایاں ہوں گی۔
محکمہ موسمیات کے ڈائریکٹر نے کہا’’وادی کشمیر میں مجموعی طور پر کسی بڑی موسمی سرگرمی کی توقع نہیں ہے۔ موسم ابر آلود رہے گا اور بعض مقامات پر وقفے وقفے سے ہلکی بارش اور مختصر دورانیے کی بارشیں ہوں گی۔ نہ موسم مکمل طور پر صاف ہوگا اور نہ ہی مسلسل بارشیں ہوں گی۔ یہ صورتحال تقریباً۵؍اگست تک برقرار رہنے کا امکان ہے‘‘۔
احمد نے کہا کہ جمعرات کو وادی کشمیر اور جموں صوبے کے مختلف اضلاع میں وسیع پیمانے پر بارش کا امکان ہے۔
انہوں نے کہا’’آج وادی کشمیر اور جموں صوبے کے مختلف اضلاع میں وسیع پیمانے پر بارش ہوگی۔ بیشتر علاقوں میں مختصر بارشیں ہوں گی، جبکہ بعض مقامات پر تیز بارش بھی ہو سکتی ہے‘‘۔
محکمہ موسمیات کے ڈائریکٹر کے مطابق جمعہ کی علی الصبح جموں صوبے میں ایک اور شدید بارش کا سلسلہ متوقع ہے، جبکہ۲ تا۳؍ اگست اور۳ تا۴؍اگست کے دوران بھی بارش کے مزید سلسلے متوقع ہیں۔
احمد نے کہا’’جموں صوبے میں خصوصاً رات گئے اور علی الصبح موسلا دھار بارش کا امکان ہے، جس کے نتیجے میں لینڈ سلائیڈنگ، مٹی کے تودے گرنے اور پہاڑوں سے پتھر گرنے کے واقعات پیش آ سکتے ہیں‘‘۔انہوں نے خبردار کیا کہ بعض حساس علاقوں میں شدید بارش کے باعث اچانک سیلاب (فلیش فلڈ) بھی آ سکتے ہیں۔
کسانوں کو مشورہ دیتے ہوئے مختار احمد نے کہا کہ انہیں اپنی معمول کی زرعی سرگرمیاں روکنے کی ضرورت نہیں ہے۔انہوں نے کہا’’کسان معمول کے مطابق اسپرے، کھیتوں کی تیاری اور کھاد ڈالنے جیسے زرعی کام جاری رکھ سکتے ہیں‘‘۔انہوں نے مسافروں، سیاحوں، ٹرانسپورٹروں اور روزانہ سفر کرنے والوں کو، خصوصاً جموں صوبے میں، احتیاط برتنے کی ہدایت دی۔
محکمہ موسمیات کے ڈائریکٹر نے کہا’’مسافر، سیاح، ٹرانسپورٹر اور روزانہ سفر کرنے والے افراد موسمی پیش گوئی کو مدنظر رکھتے ہوئے اپنے سفر کی منصوبہ بندی کریں۔ بالخصوص چناب وادی، پیر پنجال خطے اور سرینگر-جموں قومی شاہراہ پر سفر کرنے والوں کو لینڈ سلائیڈنگ اور مٹی کے تودے گرنے کے خدشے کے پیش نظر چوکس رہنا چاہیے اور انتظامیہ و ٹریفک حکام کی جانب سے جاری کردہ ہدایات پر عمل کرنا چاہیے‘‘۔
درجہ حرارت کے بارے میں مختار احمد نے کہا کہ آئندہ دو ہفتوں کے دوران دن اور رات کے درجہ حرارت میں بتدریج اضافہ ہوگا، جس کے بعد اگست کے آخری عشرے میں درجہ حرارت کم ہونا شروع ہو جائے گا۔انہوں نے کہا’’یہ سلسلہ تقریباً۲۰ ؍اگست تک جاری رہے گا، جس کے بعد درجہ حرارت بتدریج کم ہونا شروع ہوگا اور موسم خزاں کی آمد کا آغاز بھی اسی عرصے کے بعد بتدریج متوقع ہے۔‘‘
