’فنڈز موجود ہونے کے باوجود خرچ نہ کرنا ناقابلِ قبول ‘ عمر کی ترقیاتی منصوبوں کی بروقت تکمیل اور محکموں کو رفتار بڑھانے کی ہدایت
(ڈی آئی پی آر )
سرینگر؍۲۸جولائی
وزیر اعلیٰ جموں و کشمیر عمر عبداللہ نے منگل کو سول سیکرٹریٹ سرینگر میں سرمایہ جاتی اخراجات (کیپکس) سے متعلق ایک اعلیٰ سطحی جائزہ اجلاس کی صدارت کرتے ہوئے تمام محکموں کو ہدایت دی کہ وہ ترقیاتی منصوبوں پر اخراجات کی رفتار میں نمایاں تیزی لائیں اور دستیاب فنڈز کے بروقت استعمال کو یقینی بنائیں، کیونکہ بنیادی ڈھانچے کی تعمیر، عوامی خدمات کی فراہمی اور پائیدار معاشی ترقی کے لیے فنڈز کا بروقت استعمال انتہائی ضروری ہے۔
وزیر اعلیٰ نے ان محکموں پر خصوصی توجہ دینے کی ضرورت پر زور دیا جہاں اخراجات کی رفتار سست ہے اور مالی سال کے آخری مہینوں تک فنڈز خرچ کرنے کے رجحان پر بھی تشویش کا اظہار کیا۔
عمرعبداللہ نے کہا’’فنڈز موجود ہوں اور پھر بھی انہیں خرچ نہ کیا جائے تو یہ نااہلی ہے۔ اس کا جواز پیش کرنا انتہائی مشکل ہے۔ فنڈز نہ ہونا تو سمجھایا جا سکتا ہے، لیکن دستیاب رقم کا استعمال نہ ہونا کسی صورت قابلِ وضاحت نہیں‘‘۔
عمر عبداللہ نے کہا کہ یہ جائزہ اجلاس جان بوجھ کر مالی سال کے آغاز میں منعقد کیا گیا تاکہ بروقت اصلاحی اقدامات کیے جا سکیں اور محکمے باقی ماندہ کام کے موسم سے بھرپور فائدہ اٹھا سکیں۔
وزیر اعلیٰ نے کہا’’کشمیر وادی اور جموں کے میدانی علاقوں میں ابھی بھی کام کرنے کے لیے کافی وقت دستیاب ہے۔ پہلے سے جاری شدہ فنڈز خرچ نہ ہونے کی کوئی وجہ نہیں ہونی چاہیے۔ ہر محکمہ اس معاملے کو سنجیدگی سے لے‘‘۔
وزیر اعلیٰ نے ریاستوں کو سرمایہ جاتی سرمایہ کاری کے لیے خصوصی امداد(ساسکی)اسکیم کے نفاذ کا جائزہ لیتے ہوئے ہدایت دی کہ اس اسکیم کے تحت مختص تمام فنڈز کا مکمل استعمال یقینی بنایا جائے، کیونکہ موجودہ مالی سال میں رقم خرچ نہ ہونے کی صورت میں آئندہ سال جموں و کشمیر کے لیے مختص فنڈز میں کمی آ سکتی ہے۔
عمرعبداللہ نے کہا کہ ساسکی پارٹ-اول کے تحت دستیاب ہر روپے کو خرچ کیا جانا چاہیے اور تمام محکمے فوری طور پر اہل ترقیاتی منصوبوں کی نشاندہی کریں۔ انہوں نے وزراء کو بھی ہدایت دی کہ وہ ہر پندرہ روز بعد اصلاحاتی اہداف کا جائزہ لیں تاکہ جموں و کشمیر کو اسکیم کے اصلاحاتی جزو کے تحت اضافی مالی امداد حاصل ہو سکے۔
وزیر اعلیٰ نے کہا’’جتنی جلدی ہم مطلوبہ اصلاحات نافذ کریں گے، اتنی جلدی اضافی فنڈز ملیں گے اور انہیں مؤثر انداز میں استعمال کرنے کے لیے بھی زیادہ وقت دستیاب ہوگا‘‘۔
وزیر اعلیٰ نے ہدایت دی کہ جن منصوبوں کو انتظامی منظوری اور ٹینڈرنگ کا عمل مکمل ہو چکا ہے، ان پر فوری طور پر کام شروع کیا جائے۔ ایسے منصوبوں کو ابتدائی طور پر کیپکس بجٹ سے مالی اعانت دی جا سکتی ہے اور بعد میں اضافی فنڈز دستیاب ہونے پر انہیں ساسکی کے اصلاحاتی جزو میں منتقل کیا جا سکتا ہے۔
عمرعبداللہ نے محکموں کو یہ بھی ہدایت دی کہ وہ اگلے مالی سال کے لیے ترقیاتی منصوبوں کی مضبوط فہرست ابھی سے تیار کریں اور فنڈز کی منظوری کا انتظار کرنے کے بجائے منصوبہ بندی پہلے سے مکمل رکھیں۔
وزیرا علیٰ نے اس بات پر تشویش ظاہر کی کہ بعض محکمے مالی وسائل دستیاب ہونے کے باوجود مناسب منصوبوں کی نشاندہی نہیں کر پا رہے ہیں۔ ان کے مطابق حکومت کو اب فنڈز کی کمی نہیں بلکہ منصوبوں کی تیاری کے فقدان کا سامنا ہے۔
عمر عبداللہ نے محکموں کو مشورہ دیا کہ بجٹ مشاورت کے دوران اراکینِ اسمبلی کی جانب سے پیش کی گئی ترقیاتی تجاویز، خصوصاً دو کروڑ روپے سے زائد لاگت والے منصوبوں، کا ازسرنو جائزہ لیا جائے تاکہ انہیں مستقبل میں ساسکی فنڈنگ کے تحت شامل کیا جا سکے۔
وزیر اعلیٰ نے مزید ہدایت دی کہ۲۰۲۷۔۲۸ کے مالی سال کے منصوبوں کے لیے انتظامی منظوری اور دیگر قانونی کارروائیاں پہلے ہی مکمل کر لی جائیں تاکہ فنڈز کی منظوری ملتے ہی منصوبوں پر عمل درآمد شروع کیا جا سکے۔
عمرعبداللہ نے مرکزی معاونت یافتہ اسکیموں کے تحت اخراجات کی رفتار بہتر بنانے پر بھی زور دیتے ہوئے متعلقہ محکموں کو ہدایت دی کہ وہ فنڈز کے استعمال کی مسلسل نگرانی کریں اور تمام ترقیاتی پروگراموں کے لیے جاری کی گئی رقوم مقررہ مدت کے اندر مؤثر انداز میں خرچ کریں۔
وزیر اعلیٰ نے ٹینڈرنگ کے عمل کو مزید آسان اور شفاف بنانے سے متعلق وزراء کی تجاویز کا بھی نوٹس لیتے ہوئے متعلقہ محکموں کو ہدایت دی کہ شفافیت اور جوابدہی برقرار رکھتے ہوئے خریداری کے طریقۂ کار کو مزید مؤثر بنانے کے لیے مناسب نظام وضع کیا جائے۔
عمرعبداللہ نے امید ظاہر کی کہ تمام محکمے فوری سنجیدگی کے ساتھ کام کریں گے اور آئندہ جائزہ اجلاس میں مختلف شعبوں میں سرمایہ جاتی اخراجات میں نمایاں بہتری دیکھنے کو ملے گی۔
اس سے قبل ایڈیشنل چیف سیکریٹری خزانہ شیلندر کمار نے مالی سال۲۰۲۶۔۲۷ کے دوران سرمایہ جاتی اخراجات کی صورتحال پر تفصیلی پریزنٹیشن پیش کی، جس میں یو ٹی سیکٹر، ضلعی کیپکس اور مرکزی معاونت یافتہ اسکیموں کے تحت اخراجات کا جائزہ لیا گیا۔ انہوں نے ان محکموں کی بھی نشاندہی کی جہاں اخراجات توقعات سے کم رہے اور فنڈز کے سست استعمال کی وجوہات بیان کیں۔
